$300重拾紅白機回憶

紅白、超任都玩得，不過就唔好兩種帶一齊插，否則後果自負
有齊S-video同RCA，可惜到試個陣就壞咗個S-video頭
唔止壞S-video，重連手掣線都爛爛地，部機QC認真麻麻地
無敵嘅結衣~

文：MenClub 胡說　　圖：互聯網
POSTED ON 24 Jul 2014

由1982至1987的五年，可謂日本電玩及手提音響產品的第一段發展黃金期，Sony武道館Walkman、NEC PC Engine⋯⋯多不勝數，但講到有「神級地位」的，必定是1983年暑假推出的任天堂「紅白機」（Famicom）。《兵蜂》、《魂斗羅》、《龍珠Z》、《惡魔城》的過版及「打大佬」場面，好多70後或80後都仲好記得。老老實實，大家嘅紅白機可能已死喺堆填區九世，帶呢，可能仲有keep住三、四餅。
我相信有唔少人好似我，間中心思思想攞番部紅白機出嚟玩，但火牛唔見咗，controller又死死哋，點算？其實，東京秋葉原間唔中都有啲懷舊電玩舖，售賣可以玩到紅白機的兼容機。當中較新款的，有去年由Gamejoy發表的FC Dual，近期已有人返咗水貨，售價大概$300港元，即使玩幾次收埋一二角都唔會肉痛。筆者身先士卒購入一部，順便同大家講講除咗online shop或拍賣場，香港仲有邊度可以買到中古紅白機game。
一機多用幾近通殺紅白機、超任（Super Famicom）山寨機早就出過一大堆，但時間飛逝，莫講紅白機，就算係超任，六、七年前已無廠商再肯「山寨」。六月初抵港嘅Gamejoy FC Dual，就一次過滿足多個願望，首先，佢有齊紅白機同超任遊戲盒帶插槽，操作亦相當簡單，插餅帶落去就自動辨認到係紅白定超任，上GamJoy Japan個facebook，更可發現有對應Sega 16 Bit MegaDrive盒帶adapter賣，呢鋪真係你玩晒喇。非也，因為系統不支援美版遊戲（包括灰機及NES）。
但係呢，平嘢有時真係冇好，例如手掣握感唔算好、電線接駁位亦唔太能夠大力拉扯，機身入帶插槽亦不設退帶掣，換帶總要用力少少扯番餅帶出嚟，老實講，我好驚整爛餅帶。QC同手工雖然僅僅合格，不過，部機無需配轉壓火牛，香港機迷一插即玩。今次試機，特別搵來兩隻歷史有番咁上吓，70、80後必玩嘅遊戲測試：紅白機有《聖鬥士星矢黃金傳說》，超任則有《孖寶賽車 Super Mario Kart》，咪話我聽你未玩過呀！
先試紅白機，一開始就出師不利，畫面模糊不清，試吓用綿花棒抹盒餅金屬接觸部份，都係唔得。靈光一閃，用返細個絕潮，搵口吹吓餅帶嘅金屬接觸部份，點知呢招仲work。不過，論到手掣handling及就手程度，就真係麻麻哋，皆因FC Dual喺用超任手掣設計，啲掣細粒咗，擺位又唔順手，要畀啲時間適應，另外，要留意玩紅白機盒帶時，係出唔到16：9畫面，間中亦有聲大聲細的情況。接著，試玩超任盒帶，一開即著零煩惱。筆者曾想以S-Video輸出畫面，但卻間中「有聲無畫」，最後都係用返RCA線插座。
FC Dual vs Simulator 我實知有班口痕友、花生友同厚多士話：「呢個年代，仲駛乜鬼買部新機嚟玩舊帶咩，上網玩模擬器就得啦，重要啲Game係任download，一毫子都唔使。」我會咁睇，買得呢部機嘅人，一定唔滿足於對住個Mon自己玩。相反，係買嚟show off以前有幾多紅白機/超任珍藏。另外，成班舊同學等睇opening畫面準備「開波」嘅場面，亦非模擬器可媲美。計我話，如果成日有舊朋友聚舊，咁就好應該買番部，一邊雙打孖車同雙截龍，一邊隊啤實好feel。而且，用模擬器玩2P，又要用Keyboard先玩到，隨時仲要逗埋部電腦出廳，幾唔方便。
經典好Game何處尋如果無儲開舊game盒帶，最理想當然飛去日本秋葉原、飯田橋或後樂園一帶嘅中古game shop。喺香港，識行路或上網就自有辦法。旺角信和中心地庫：以下所講的只係信和中心地庫某鋪，佢地已靜俏俏咁服務game迷兩年多，門口有部可以直插超任帶，不時著住嘅Demo機，一睇，你就知道搵啱地方。不過，定價唔算吸引，以筆者持有的《黃金傳說》（無盒）為例，店方開價＄250，《孖寶賽車》無盒都索價近百，店員見筆者有意想走，先即刻減價$50。不過，呢間鋪好在畀你買之前試清係work先畀錢，舖外亦設有bargain Bin，專放以前「少人吼」嘅少眾遊戲，售價由$20起。
Amazon.jp：足不出戶，到日本Amazon碰運氣。選擇多之餘，間中都有機執到平貨，部份的售價更低至$30一盒。但是，要留意部份賣家不會將遊戲寄到日本以外地區，咁唯有搵代購，又或者請日本朋友幫你走轉郵局。遊戲盒帶本身唔重，建議你一次過買多幾盒，除開慳唔少郵費。