最近Amazon申請幾項無人機相關專利當中，最令人期待就係「airborne fulfillment center」！專利圖見到Amazon將會以巨型飛船作為空中貨倉，然後利用小型無人機喺空中收發貨物。物流中心將會浮喺45000英尺高空，而且會有動力裝置方便移動至唔同地區作為物樞紐。

Amazon嘅專利申請提到，物流中心可以應用於大型活動時，就可以用空中物中心運載紀念品同食物，場內人士透過手機落單之後，再由無人機分派食物同貨物。甚至可以將物流中心當作流動廣告，當需要宣傳時就進行低飛。呢個咁龐大嘅計劃實行起嚟都有唔少困難，首先要考慮點樣要維持無人機中心動力，其次就係派貨無人機嘅續航力，仲有天氣影響，所以預計呢項專利喺短期內都難以實行。

至於Prime Air就喺呢個月於英國試行送貨服務，30分鐘就可以將貨物送到目標地方。如果將來能配合空中物流中心使用，相信會係物流行業嘅新時代。另外由於飛行機應用愈來愈普及，而且考慮到無人機獨立工作時，有可能會遇到hacker或意外，所以Amazon正研究姐成無人機隊監察，無人機之間可以互相監察位置同訊號，當其中一部無人機出現異常時，就會由附近嘅無人機護航。萬一飛行時受到攻擊或障礙物，更會採用自動迴避同返航，以確保貨物安全。