雖然Tone Free睇落同LG以前出過嘅掛頸式藍牙耳機有幾分似，不過兩粒耳塞可以拆出嚟用，直接塞入耳仔就聽到歌，完全無線。又話無線，但又整個頸圈，好無聊囉。其實頸圈係等你將耳塞放返入去，唔怕整唔見之餘仲可以叉埋電，而且頸圈仲有震動提示功能，當你手機有來電或者訊息時就會震動通知你。如果你仍然覺得多餘，唔緊要。其實Tone Free仲有一個耳機盒仔，同樣有叉電功能，呢個會唔會實際啲呢？

至於集耳機同喇叭於一身嘅Tone Studio，仍然係掛頸式，耳塞係用返有線設計，不過就內置4隻喇叭可以輸出3D音效，而且支援Hi-Fi DAC提升音效表現。我唔知掛頸喇叭有咩好處，但希望唔會有人喺地鐵同巴士開住個喇叭聽歌、睇片啦。雖然LG冇手機爆炸，但近年冇乜邊件產品「爆」得起，而今次跟風玩無線耳機都算跟得貼，但售價同推出日都未定。