大家應該仲記得Lily呢部航拍機，隨手掟出去就識得跟住你飛，喺2015年發起眾籌之後勢不可擋，人人都想要兼氹到大水喉注資。不過呢個項目近日正式宣布失敗，全數退款。

kickstarter唔少項目都係講到無敵，做就有心無力。好似2015年發表嘅Lily航拍機，當時嘅宣傳片以拋起就自動飛同追蹤為賣點，透過kickstarter同融資得到接近3400萬美元嘅資金，不過出貨日就一拖再拖。本來話2016年2月可開始派貨，但一直連影都冇，愈來愈多人質疑佢哋到底有冇實物，直到上個月仍死撐話就嚟出貨。點知踏入2017年就宣布收檔，創辦人解釋係資金短缺令開發終止，所以決定執笠。好在Lily冇走數，已經back咗嘅苦主可以喺60日內獲得全數退款。