位於俄羅斯郊區沙圖拉嘅高溫研究所(Institute of High Temperatures)，最近就成功為新開發嘅電磁砲進行測試，炮彈以每秒3公里速度射出，時速即係大約1萬公里，比音速快7倍。測試只係一支重15g嘅塑膠炮彈，就可以打穿一塊幾厘米厚嘅鋁板，聲稱威力足以打穿現代所有裝甲！

所長Alexei Shurpov更表示佢哋準備生產秒4.5公里嘅砲彈，而且認為電磁砲對研究高能量物理有好大幫助。雖然有關方面話電磁砲暫時只會作科研用途，但有傳聞俄羅斯有意將電磁砲送上國際太空站，相信未來保護地球嘅任務可以交畀戰鬥民族負責。

如果真係發展成軍用，俄羅斯嘅電磁砲應該會同美國一樣係艦載武器，用嚟取代部份飛彈提升作戰效率。雖然電磁砲威力強大，但其實仍有唔少隱憂，事關由於電磁砲冇火藥推進，所以砲彈會因空氣阻力令威力大減，對遠程目標難以發揮出實力。另外，高耗電亦係一大問題，好似美國嘅電磁砲，發射一次就要用2500萬瓦電力，非常大食！