雖然喺香港冇鋪天蓋地嘅宣傳，又冇乜爆炸性新聞，但LG G系旗艦機其實係一部唔錯嘅手機，特別係G3同G4都係口碑唔錯嘅手機，實而不華，日水版更加係唔少追求實用嘅Android用家心水添。不過上年G5改用模組化之後引來唔料劣評價，新一代G6已確定會喺MWC發表，而且已有流出規格同機身外觀，取消模組設計之後睇落有返G3同G4嘅影子。

傳聞G6將會用Qualcomm Snapdragon 821處理器、4GB RAM+32GB ROM，spec同V20差唔多。5.7" 18︰9 2K屏幕，仲有1300萬像素雙頭，而前置鏡頭更有100度廣角拍攝，大家自拍同合照就可以影得更靚，至於音效就繼續玩靚聲用升級版Quad DAC。另一點值得開心就係有返防水防塵功能，而且電池容量有成3200mAh，續航力比上代更長，可以去到12小時。不過就犧牲咗可以換電呢個主要賣點，而當初唔少用家都係因為可以換電先揀LG，所以LG此舉應該會令一直支持G系嘅用家好失望。傳聞G6會喺4月7日發售，價錢就應該要等到LG喺2月26日嘅MWC 2017發布會先揭曉喇。