被喻為Steve Jobs遺物嘅Apple新總部，今年4月終於可以正式使用。新總部佔地175英畝，面積大約有85座足球場咁大，足夠容納12000名員工喺未來6個月陸續搬入去新office。已知新總部會有保安研究設施、10萬呎健身中心、2英哩跑步徑、人造果園、大草地同埋池塘，唔講真係會以為係渡假村。

以上設施當然係員工福利啦，不過Apple Park都有對外開放嘅Cafe同鋪頭，遲啲仲會有坐到1000人嘅「Steve Jobs Theater」禮堂，唔知有冇機會開放畀fans朝聖呢？值得留意係整個總部都會使用再生能源，而主建築頂部嘅太陽能板能夠輸出17兆瓦電力，所以有唔少人認為成隻飛碟咁嘅Apple Park，話唔定真係可以成座飛走！