講到網速，冇得唔講下呢兩日睇電訊商互片嘅花生。話說csl見自己喺蘋果日報做嘅測試包尾之後就嬲豬，然後自己再做一次測試，開名向3HK、數碼通同中行動挑機，結果全部測試都贏成條街。結果當然令其他對手不滿啦，又有人指csl喺測試前出術添！邊間最快或者最穩定真係好難講，因為連線穩定性，有冇限速，收費同數據量上限都係好重要嘅因素。

不過講到速度，香港其實不嬲都唔差，而且平均網速更加係全球第四名! 全球網速報告係由Akamai進行統計，最新嘅2016年第四季報告顯示，全球平均網速由上季6.3Mbps提升至7Mbps，而且比去年同期提升咗26%。全球網速排名第一位仍然係南韓(26.1Mbps)，連續12季成為全球最快網速國家。至於上季以20.1Mbps速度排名第二位嘅香港，受到全球平均網速提升，加上被挪威(23.6Mbps)同瑞典(22.8Mbps)後來居上，令香港平均網速就算提升到21.9Mbps，但仍只能排第四名。至於平均移動網速，英國就以26.8Mbps成為全球之冠，而香港只得7.2Mbps，仲慢過大陸(7.4Mbps)。