上年2月成功研究出人造牛肉嘅生物科技公司Memphis Meats，最近就利用雞細胞培育出「試管雞肉」，仲發布兩張雞肉料理嘅相片，睇落同普通雞肉冇乜分別，參與試食嘅人亦話口感都差唔多。要培育出人造雞肉，首先要喺活家禽身上提取細胞，然後喺乾淨嘅環境下為細胞提供養份，只需4至6星期，細胞就會變成可食用嘅肌肉組織。

能夠「無中生有」咁變出雞肉，可以減少畜牧業帶來嘅碳排放問題，亦唔使咁擔心食到抗藥同激素肉類，點解唔即刻量產呢？原來生產1磅雞肉成本高達9000美元，而且目前技術未成熟兼成本高昂，所以暫時難以推出。其實Memphis Meats上年用人造牛肉整牛丸時，成本係雞肉嘅兩倍，而事隔一年已經大幅降低成本，所以創辦人Uma Valeti預計要到2021年就可以正式推出。相信到正式推出市面時，呢類人造肉嘅售價應該令普遍消費者接受得到。