我有個朋友好耐以前搞過車尾箱電影之夜，好神心帶齊投影機同DVD機，然後將屏幕掛喺尾門，擺埋摺凳就set好。雖然要拎大堆嘢出去兼駁來駁去，但出嚟效果係幾好feel嘅，至於搞咁大壇嘢嘅目的，當然唔係電影欣賞咁簡單啦。可能BenQ都知道大家鍾意玩野外，所以就推出呢部戶外投影機GS1。頭先提過朋友嘅電影之夜要駁一大輪線，但GS1就唔使搞咁多，事關有內置電池可以用到3個鐘，而且仲有車充兼可以USB輸出幫手機平板充電都得，電源問題輕鬆解決。

咁睇片又可以點搞呢？GS1內置Android系統，本身已經裝好睇片app，連接WiFi就可以上網睇片。除此之外，GS1亦有齊HDMI、microsSD同USB 2.0/3.0之外，仲支援Wi-Fi同藍牙4.0，方便你用手機嘅屏幕鏡射功能投影到大畫面，拎佢駁埋任天堂Switch嚟玩應該好過癮。

以戶外作為賣點，當然要有戶外功能support先得。GS1通過IPX1防水同60cm跌撞測試，落細雨時照播都冇問題，同埋真係冇諗過投影機可以跌，而且成部機都唔夠1kg，夠晒輕便。投影距離方面，GS1只需1米就可以投影出60"畫面，1.7米更可以輸出100"超大畫面，最大可以去到200"，內置梯形校正功能方便你喺唔同尺寸都可以校出合適畫面。不過利用LED光源嘅GS1亮度只得300流明，真係要夠黑先用得到，而且只支援720p，畫面放太大時畫質就會冇咁靚。雖然GS1係幾有趣，但暫時未見香港有得賣，台灣定價就係台幣24,900元，計返大約$6320港元，有機會等我問下BenQ有冇得借來玩先。