早排先成立鑽地公司Boring準備開發地下世界嘅Elon Musk，今日又再成立新公司Neuralink，而今次嘅目標係要將人腦同電腦結合，希望可以提升人腦效能，為人腦硬改升級！

曾經揚言人類要同機械結合先可以同AI競爭嘅Elon Musk，今次計劃將電腦同人腦結合，係要將擁有神經網絡嘅微型電腦植入人腦，提升人腦效能，意味Cyborg時代即將展開。其實現時都有類似嘅腦部裝置，用嚟治療柏金遜同神經退化疾病，所以有人預計Neuralink初期嘅發明都會應用於治療癲癇同抑鬱症，但Elon Musk嘅最終目標應該放得更加長遠。

可能係我諗多咗又或者相信奇點主義，近年科技發展速度已經遠超預期，人類嘅肉身開始同機械結合，甚至將意識上傳呢啲咁科幻嘅情況已經有可能一一成真。正如我最近好鍾意玩嘅《Nier Automata》，就係講將人類靈魂同肉體分離，然後將靈魂變成數據咁upload上server，再download到人造肉體之後，咁就可以達到意識永續嘅「永生」。若然Elon Musk嘅計劃成功，將來唔排除可以實現「桶中之腦」提出嘅理論。如果你都對呢個話題有興趣，推薦大家可以睇下由Johnny Depp主演嘅《Transcendence》(港譯︰超越潛能)，話唔定可以inspire到你有新想法，值得一睇。