{ SKIP }
文:MenClub 魏文青  
POSTED ON 12 Aug 2018
每個人都試過因為作息時間突然改變而感到「唔聚財」,大家都識得話係「生理時鐘」調節唔到,問題究竟咩係「生理時鐘」?根據英國《每日郵報》引述兩個研究結果表示,所謂「生理時鐘」其實與體內多種賀爾蒙(如被稱為「壓力賀爾蒙」嘅皮質醇、以及「快樂貢獻者」血清素)嘅排放同含量有關。咁如果完全按照呢個生理時鐘,你每日又應該係點過呢?

朝早六點:起身

如果按照生理時鐘,六點鐘倒塔咁早就應該係你起身嘅時間,事關你體內嘅皮質醇開始上升,並會起身後半個鐘到達高位。而皮質醇除咗代表壓力,亦代表動力,所以早起身你會覺得個人特別有幹勁。相當適合規劃一下全日嘅行程。

朝早八點:全日最辛苦嘅Moment

冇錯,起身後兩個鐘你就會迎黎全日最辛苦、最攰嘅時候,原因可能係因為體內繼續分泌瞓覺時先會有嘅褪黑素。解決方法係出去照下太陽,用半個鐘時間話畀身體知「醒咗架啦!唔好再分泌褪黑素啦」。喺呢個時候做運動亦能夠提升整日嘅狀態。

朝早九至十二點:積極向上Mode啟動

由九點開始,受惠於皮質醇、血清素等影響,直到12點你都會保持正面思想,而且更為勇敢、亦冇咁易嬲,分析能力、工作效率亦會係全日最高。九點嘅時候飲咖啡以咖啡因提神、覺得大壓力時透過深呼吸控制皮質醇水平等都有助維持呢個狀態。

下午二至五點:頹廢Mode接手

高峰過後自然係低谷,受賀爾蒙回落影響,你嘅心情亦會由朝早嘅積極向上轉入另一階段,覺得疲倦、失去動力,。下午兩點五十五分,血清素與血糖同樣步入全日低位,亦係你整日工作效率最差嘅時候。而由三點半左右直到五點,你亦會開始覺得煩躁。

但又要注意嘅係,四到五點呢段亦係最容易諗到「好橋」嘅時候,因為雖然腦部不在最佳狀態,比較放鬆嘅思路亦提高創意。

晚上六點至九點:Happy Hours!

你以為每到傍晚你就開心,係因為就黎放工?啱咗一半,同時亦因為你嘅體溫於6點達到全日高位。如果你喺呢個時候食晚飯,你應該選擇高碳水化合物嘅食物,增加血糖及胰島素分泌,令你覺得眼瞓——但同時更加平靜。同時又因為皮質醇一直降低,所以變得懶洋洋。直到9點你都會保持好心情,如果你發現自己太多嘢講,可能係因為皮質醇偏高。

晚上十至十一點:做愛做的事,然後瞓覺

由九點開始,你嘅身體就會開始分泌褪黑素準備瞓覺,而你亦都應該遠離發光裝置、收拾心情,以免影響睡眠。咁呢個時候有咩好做?做愛就係一個好選擇!而且性高潮會分泌催產素,減少焦慮、增加與伴侶的安全感。

做完愛就係時候瞓覺,對大部人黎講,11點上床瞓覺會比較容易完成整個睡眠循環,令你聽日以最好狀態起身。

午夜到朝早五點:葉蒨文嘅《零時十分》

「零時十分 倚窗看門外暗燈 迷途夜雨靜吻路人」,如果你仲未瞓,咁呢句歌詞好有可能就係你心情嘅寫照。有冇諗過點解每到夜晚都總係覺得空虛覺得寂寞覺得凍?主要嘅原因係因為血清素等快樂賀爾蒙去到低點,而褪黑素又逐漸提高,換言之你唔多開心,而且好眼瞓,但又因為某啲原因冇瞓,所以你易嬲,你悲觀。自凌晨四點身體會再開始製造皮質醇,準備幾個鐘之後叫醒你,但如果你本身皮質醇就偏高,呢個時候你就可能會因為焦慮而紮醒。

以上就係根據人體內分泌而成嘅「生理時鐘」,或者同大部份都市人嘅日常生活作息有啲唔同,但作為參考,你就可以知道自己嘅心情實際上係受咩影響,亦有助你安排唔同活動啦。

DailyMail

為咗關懷小丁丁的你,英國公司They Fit近日推出咗「全球最細小condom」!
thezone
關懷小丁丁的你!7.8cm全球最細小condom
16 Aug 2018
原來佢身材都好好架!
thezone
迪麗熱巴旅遊節目泳衣亮相 唔露肉一樣吸引
15 Aug 2018