{ SKIP }
文:MenClub Raphael  圖:互聯網
POSTED ON 12 Dec 2016

男人著西裝唔需要名牌,唔需要貴料,但就最緊要Fit身,搵間啱自己嘅裁縫Tailor-made,著出嚟先會著得舒服、型棍、又有自己Style。同樣道理,一樣可以應用喺飲酒之上,平時大家叫1 Pint啤酒,通常隻杯都係跟返牌子,大路嘢例如Stella Artois、Hoegaarden都有專用杯,但你有無諗過,其實啤酒杯應該跟自己,做隻自己專用嘅Beer Glass?

日本酒業巨頭Suntory嘅D.N.A Glass,就號稱係跟據你嘅身體度身訂造。佢地嘅理論係,每個人飲酒都有不一樣嘅準則,例如對酒精、香氣、風味嘅敏感度同接受程度,甚至飲用習慣都會有差異,而呢啲訊息係可以喺你嘅D.N.A (脱氧核醣核酸) 入面搵得到。Suntory會依照呢啲資料,特製一隻有相應厚度、形狀、杯口大小嘅D.N.A Beer Glass俾你,而飲家亦能從中得到最佳嘅飲用體驗。

製作步驟相當簡單,Suntory會用特別嘅儀器分析你所提供嘅唾液樣本,再用獨創演算法整個3D Design,最後用埋3D打印技術,咁一隻屬於你嘅基因啤酒杯就誕生啦!大家可以上Suntory個官網,參考下當中嘅演化規則,同埋睇下佢為各國飲家所設計嘅作品。

嗱,講就好似好正,不過睇得日本科幻動漫電影太多,就硬係覺得俾基因樣本一間日本公司好似唔太安全。你話我FF上腦都好,喺一個無乜資訊私隱嘅年代,大家更加要保持警覺性,如果第時喺街見到一個同你一模一樣嘅人,我覺得係複製人嘅機會絕對大過Doppelgänger。

Source : Suntory DNA Glass


Zaku,日文漢字 — 「作」,Sake Competition 2017 奪得純米酒部的金獎、銀獎,呢兩款來自三重縣鈴鹿川的清酒,你又試過未?
watchesandwine
【不是渣古】實力憑證 — 三重縣清水清三郎之「作」
19 Jan 2018
獨立腕錶品牌,每一家都堅持有自己嘅特色同路線,呢個先係腕錶市場真係需要嘅獨特性!
watchesandwine
【SiHH 2018】再睇日內瓦錶展 4 家獨立錶廠重點作品
18 Jan 2018