「後生仔，飲多兩杯啦，Sake唔係好老餅架咋！」喺公民教育廣告入面，我地成日聽到飲酒有害健康，呢句無呃你嘅，但只你夠合法年齡，又識得Drink Responsibly，咁無話唔飲得嘅。話說日本有個清酒博覽會，一反Sake嘅正經、嚴肅形象，以Pop Art、動漫卡通、攝影等等主題，重新包裝日本酒，目的都係想令Sake文化變得年輕，吸引多啲後生仔飲啫。

「I LOVE SAKE 日本酒マニアック博 in 東京」，由2017年2月10日至3月5日，喺東京池袋嘅Parco本館舉行，個展覽之前已經喺關西大阪搞過一次，獲得廣泛好評，而日本各地酒造都同意要令日本酒年輕化，吸引更多後生仔飲同埋入行釀酒，所以今年直頭搬去東京，後生仔集中地嘅池袋度既舉辦。

大會主旨係「日本酒 = 日本 Pop Cult」，以各種得意過癮嘅手法包裝傳統Sake，雖然係舊酒新瓶嘅玩法，但對年輕人嚟講都有相當大嘅吸引力。展館眾多設計品中，最受到注目嘅，一定係呢堆「One Cup」酒杯，設計好靚之餘仲crossover咗多位插畫師、藝術家等等，樽上入面你可以搵到一堆大家熟悉嘅面孔，如成日喺香港出現熊本熊部長。

除咗賣萌產品帶來視覺衝擊之外，大會更希望參加者可以多啲接觸清酒呢一個日本文化瑰寶，你可以親身試飲，感受各地作品嘅迴異風格，又可以喺展博中了解更多關於日本清酒、酒造嘅歷史同埋變化，寓教於樂，連我呢啲港燦Sake迷都要Like一Like佢啦。

Source : 日本酒マニアック博 Facebook
Photo : Exite News