Photos: Toyota

新世代86由雛型到而家，已有接近8年歷史，揸過嘅、炒咗嘅、停牌急讓嘅，做之一句到尾，最令人興奮嗰一浸已經過去。 

所以，每當提到86有facelift，你實會聽到有人話：「改極又係86，冇Turbo！」

我咁睇，以豐田呢種「世界仔」到爆嘅車廠，如果主流意見真係咁想佢哋加Turbo，咁即管加畀你班友仔囉。

但我覺得，86係豐田近十年少數有心搞嘅運動性車種，而且係要透過呢款車表達一種理念。外間插佢冇Turbo，其實又冇乜所謂，因為86喺海外巿場仲係賣得唔錯。

日本傳媒引述接近豐田消息人士爆料，指廠方已同意新款86沿用自然吸氣引擎，但會透過增加容積加大馬力，廠方亦屬意新款86繼續採用水平對向四汽缸格局，並沿用既有與富士（Subaru）共同開發及生產嘅「合作」方式。

盛傳容積會增至約2.4公升，馬力唔會大幅度增長，約升至230匹至240匹之間。底盤方面，好大機會以現有86底盤改良，預料軸距維持不變，反而係前懸長度（Front Overhang）與後懸長度（Rear Overhang）有望縮短。

另外，「每年一小改」嘅86，繼去年7月初改良後，今年9月初又有小改動，據知今次改動會涉及增加車架及車身剛性，另外電力輔助轉向系統亦有改良。