Photos: Tesla Motors

Tesla Model 3喺上星期六（香港時間29日上午）正式交車，好多美國汽車網站都鋪天蓋地式報道，的確，35000美元嘅定價（最基本配備，豪少少已要44000美元）非常吸引。

不過，Model 3產量目前仍然非常低，8月只有100部、9月提升至1500部，至年底增至每月20000部，來年目標生產240,000部。據悉，Tesla目前累計收到嘅Model 3訂單接近400,000部，換言止，第一個生產年度嘅產量，遠遠落後於買家數量。

有報道指，廠方由現在至2019年底，只會集中火力製作左軚版本，以應付左軚地區（例如北美）訂單，右軚地區fans要畀啲耐性嘞。 

Model 3嘅體積比現役寶馬3系大少少，車長4.69米、闊1.85米、軸距2.88米，前懸雙搖臂、後懸多連桿，淨重1610kg，以呢個size嘅房車嚟講，體重尚算合理。前、後行李艙總容積480公升。

現階段有兩個版本，基本版可行354km、長距離版可行499km。前者喺0至96km/h加速時間為5.6秒，極速209km/h，後者5.1秒，極速225km/h。

充電方面，前者以Supercharger充電半小時，夠行182km，以家用充用器（240v 32A）充1小時，可行48.3km；後者以Supercharger充電半小時，夠行274km，以家用充用器（240v 40A）充1小時，可行60km。

廠方喺現階段公布嘅車廂圖片唔算多，較有噱頭嘅係15吋中央觸控屏幕。抵港售價係幾多，唔使咁快估住嘅，如果真係2019年頭先有右軚版，到時話唔埋又有返電動車稅務優惠呢，你知政府嘅嘢啦，一時咁，一時又可以另一種態度。