在可見將來，無論豐田Alphard及Vellfire怎樣轉款，又或者六、七年不轉款，大家都會照買可也，因為Alphard及Vellfire已成為「豪華Van」的同義詞。

唔係仲有同級對手日產Elgrand嗎？

你啱，但Alphard同Vellfire的巿場佔有率實在太厲害，而且當買過或坐過這兩款車之後 ，相信好快習慣豐田式豪華Van的調味，未必再有衝動，或者應該講，懶得去試其他同類型產品。花生友又忍不住抽水：「豐田係大台，有慣性『收視』嘛！」

Alphard同Vellfire最近轉款，新車火速運抵本港，點解MenClub先試Vellfire而非Alphard？好簡單，因為筆者偏心兼有私心，嫌今代Alphard鬼面罩造型騎呢古怪（似手榴彈，又有少少似球型煙燻火腿），又鐘意Vellfire黑色車廂夠型夠潮，有少少日式VIP style味，所以明知Alphard Executive Lounge版本兩張老闆椅好特別好多gadget玩，都堅持要先試Vellfire。

講真，Vellfire同Alphard的最大差別，只在外型、車廂裝潢及中排座椅「老闆位」，至於坐感有幾好，腳位闊落程度是否比上代好得多多多，我真的不想悶到你，按著廠方新聞稿由頭細數，況且皇冠車行陳列室又不只一間，建議你落去試坐親身feel一feel。

不過，新Vellfire與Alphard都有一項全新功能，很值得詳談，就是前座乘客席擁有長達1160mm的滑動距離。我是純粹本在立心不良和有邪念去欣賞這項好設計，雖說這種豪華Van大多數時間都用來載家人或載老闆⋯⋯好心你啦，你放大雙眼望望紅隧東隧香隧，我亂講一通去統計，有不少於40%的第一、二代Alphard或Vellfire，車上都是一男加一女，撇開那些貌似老夫老妻的實例，我相信有好多男性用家，以Alphard或Vellfire接載女朋友。

站在實際角度，自己揸車，總希望女友（註：要聽話體貼那一種）坐在身邊的乘客席，如果前座乘客席的座椅都有超長滑動距離，方便honey用盡ottoman seat，打開腿墊，放平雙腿，我覺得這是很體貼的賣點；從親密的角度，女友將前座椅退到最後，大腿及小腿放平後，剛剛讓司機（男友）觸手可及，我也覺得這是很體貼男性用家的設計，所以，即使你話我係「豐田粉 」，我都要大大聲講句：「豐田好波！波⋯⋯波⋯⋯波！」

另外，今代Alphard及Vellfire都新增了車廂天花LED燈，可以隨喜好選擇16種顏色，玫瑰色、桃紅色、玫瑰色、紫色，拍攝時，日光日白，我們唯有停在公路天橋底試玩，果然係要幾迷幻有幾迷幻，豐田兄，你古惑曳曳啊！

我認為，上述的新功能或來自空間上的增長，都不及在操控及剛性提升上的驚喜。

無論是Vellfire或Alphard這類廣體單廂式汽車（即MPV），先天的車體剛性始終及不上房車或旅行車，要提高撞擊時的抵禦力，必須提高底盤及車體剛性。講到尾，最快捷的方法是增加樑桿或底盤組合作的焊接點，今代Vellfire及Alphard都新增了約200個焊接點，另外，毗鄰後懸掛及靠近兩側趟門的位置，都新增了金屬橫撐。所以，只要你揸過上代Alphard/Vellfire，再揸今代產品，即時可以感覺到新一代馬步比上代紮實，而在高速過線、中大彎畀油時，車身扭擺的幅度都比上代明顯降低。對駕駛者而言，這種從本質上的改進，大大提高快揸時的信心。

另外，扭動今代Vellfire的軚盤，其回饋力都比上代豐富，再無那種類似上兩代Camry房車「輕飄飄」的疏離感。由於底盤與車身剛性都大有提升，而軚盤回饋力亦都有明顯改善，所以，新Vellfire的操控反應明顯比上代「聽話」，感覺上，沿用自上代的274匹3.5公升V6引擎，運轉暢滑度亦再有進境，波箱電腦在快跑時的智能度更有脫胎換骨之感，即使沒有時下流行的Sport mode或「乜乜物物mode」，電腦已醒目地「派」一個最有利發揮峰值扭力的波段。一句到尾，終於似番部能面向歐洲對手的280匹日本大車。

如果你稍為熟悉Alphard車系的發展，你應該知道上代Alphard已在中國內地及俄羅斯發售，我相信今代Alphard及Vellfire，一定可以在中、俄兩地再搶更多新客。作為MenClub讀者，更好坐，更好揸，咁正經實用嘅豪華Van都有如此抵死古惑嘅design，冇理由唔Like。