Photos: Yip Wai Bun

我真係好想知有幾多人會like平治GLE Coupé。

講外型，唔好意思，完全唔覺得佢靚，講Mandom，唔覺。講大隻呢，咁佢實有份嘅。

GLE 450 AMG Coupé賣109萬。講真，咁點解唔索性買部幾年車齡嘅易手G-Wagen，再加部E-Class或E-Class Coupe。嫌租多個車位貴？我估買得GLE Coupé嘅，都唔只得一部車啩！一千幾百租多個位，養多部，唔過份吖。

SUV，某程度上係由房車同越野車結合，而家再加入所謂四門轎跑（four-door coupé），真係雜咗啲，混亂咗啲。睇到集合更多種身份嘅新車，不自覺想起港產電影《國產凌凌漆》文西（羅家英）與其發明品──超級武器霸王嘅一幕。

GLE 450 AMG Coupé外型，唔再多講，要我讚佢「靚仔」，除非畀槍篤住太陽穴。不過，GLE 450 AMG Coupé嘅動力系統算有新意。3公升V6 Twin Turbo引擎，最大馬力367匹/5500-6000rpm，峰值扭力53.0kgm/1800-4000rpm，波箱屬九前速自動（9G-TRONIC），0至100km/h加速為5.7秒。接近370匹嘅Twin Turbo引擎Benz，總有人會興奮，會有「生理反應」，而且夠晒大部，算實用。論「氣勢」，鬥大隻，長4.9米、闊2米，數字上已有壓倒性優勢，論感覺，十分滿分嘅話，可以畀到佢八分半。

中控台設計，同其他平治中型車系分別不大，個人認為平治應該「肉緊啲」，一係畀多啲跑味辣味佢，一係令佢rawr啲，粗獷啲，而家嘅賣相，有少少為求討好更多買家，走中庸，打穩陣波，談唔上有鮮明性格，我寧願亦唔介意廠方求其放個C-Class中控台上去，至少應該有啲特色同新意嘛。

GLE Coupé嘅「上半身」採用近似CLS-Class嘅四座四門轎跑設計，A柱同C柱嘅斜度都較大，但又同時採用高離地距，用「打側身先將半邊屁股靠喺座椅外側，再將身體順勢向內轉」方法上車，頭部有可能碰到A柱，慢慢嚟，唔好急。

我個子不高，如果體型高大健碩，上落車時嘅動作不宜太快太魯莾。坐定定之後，車廂橫向空間好寬落，後座橫向空間一樣，坐三個大人，無難度，後座地台亦屬同地台設計，冇「頂腳」，雙腿伸展空間好好。

放平後座椅背，由車尾望入車廂，好似縮水版地鐵港島線太古站嘅車站，上面圓拱型，好闊好大。不過，行李置放空間地台嘅離地距好高，就算將個Rimowa行李廂放平，抽落地面或放上去，唔係咁易發力，除非你好高大，可惜，我沒有六呎高，我沒有六呎高。離地距咁高，有一定程度同配備21吋輪圈有關，「霸氣」，係有代價。

講駕駛感，當然唔會當佢係一部轎跑車咁睇，所以，我仍然當佢係一部高身SUV去評價。GLE Coupé嘅車架好紮實，懸掛行程充裕，無明顯浮盪，抗傾力算幾好，咁嘅setting，已達到被界定為有跑味SUV嘅「基本點」，當然，你認同與否，還要睇你個人口味。

講到呢度，GLE 450 AMG Coupé似乎冇特別精彩惹味之處。呢個的確係事實，但公道啲講，GLE Coupé嘅入彎積極性算唔錯，而且制動力表現好理想，好豐富，係適合快揸嘅四驅越野車（你可以繼續叫佢做Coupé，但我叫唔出口）。

引擎峰值扭力達53kgm，喺3000c.c. Twin Turbo引擎級數，呢個輸出水平算突出，而且一直由1800提供至4000rpm。不過，GLE 450 AMG Coupé車重2200kg，而且配21吋胎軨（後胎315/40 R21；前胎275/45 R21），如果只用COMFORT行車模式，加速表現只係普普通通。想快想爽，至少要用SPORT。

睇番平治車系最新嘅命名新方法，原來M-Class改稱為GLE，咁GLE Coupé，可唔可以當係M-Class Coupé？