約會APP上最受歡迎的職業

文：MenClub 魏文青　　
POSTED ON 16 Sep 2018

女人嘅擇擇條件有好多，外貌、身材、學識、性格、大小通通都係，不過大家或者會認同，係現實社會中，你嘅職業可能先係最重要嘅因素。但如果你認為女人眼中只有錢，所以一定揀啲「乜師物師」做伴侶，你又未必啱喎。著名約炮神器約會APP「Tinder」近日就公佈咗多個國家嘅用家數據，列出最多人「向右掃」嘅男女職業，或者會幾令你幾驚訝。

Tinder分別公佈咗英、美、法、德、澳，等國嘅用家數據。其中英國中最受歡迎嘅男性職業頭三位為消防員、老師同室內設計師，醫生律師會計師呢啲我哋以為好吸引嘅職業全部入唔到頭十名，勉勉強強叫有個「獸醫」排第七，「機師」都排到第九。而美國方面，最受歡迎嘅男士職業頭三位係室內設計師、機師同醫生助手(Physician's Assistant)，「梗頸四」就有律師，相當黎講就算「正常」。澳洲方面頭三位就係救護員、小學老師同消防員，值得一提嘅係木匠排到第四。法國方面果然係文化之都，頭三名藝術總監、記者、攝影師全部都係文化界人士，睇黎我都要去法國住返一頭半個月。最後德國嘅頭三位就係市場營銷經理、創意總監同律師。

雖然歐美各國嘅頭三名中仍然不乏「傳統高尚職業」，但亦有好多係凡人工作(你睇記者呢啲咁「低賤」嘅工都有份喎)，證明女士們睇重嘅未必係職業嘅收入。當然，呢個結果亦可能同女士們使用約會APP嘅心態有關，若果佢哋追求嘅只係「如果想開心，為什麼需要等？」嘅輕鬆關係，佢哋著重嘅嘢可能係對方嘅職業是否有趣，外表是否有型(估計亦係大量設計類職業上榜嘅原因)，以及床上表現是否令人滿意(消防員喎…)。換句話講，女性們其實都係尋開心架咋。

另一邊廂，最受男性歡迎嘅女性職業就出現咗一個幾有趣嘅現象，就係大家喺AV會見到嘅職業，似乎都非常吃香，「護士」成為美國第一名、法國、澳洲第三名，英國第四受歡迎嘅女性職業；而空姐就成功打入除咗法國之外所有國家嘅頭十名，喺德國仲係排第一添，似乎證明全世界男人都對呢啲職業有所偏好！不過究竟係因為男人偏好呢啲職業，所以先有咁多AV以佢哋為題材；定係因為睇得多AV，男人先鍾意呢啲職業，就真係不得而知啦。
Dailymail