今個世界盃，俄羅斯同英格蘭意外表現活躍，齊齊出線在望，心情大好，不過對於國內睇波嘅球迷黎講，佢地嘅心情即將由天堂掉落地獄，因為佢地隨時喺下一場前就無啤酒飲.....

世界盃進行期間，約有十多萬球迷湧到俄羅斯支持自己國家親身睇波，邊飲啤酒，邊撐自己隊波，不過俄羅斯同英國酒吧餐廳卻面臨唔夠酒賣嘅尷尬情況。

俄羅斯首場已經大炒對手，勢頭強到一個點，鐵定首名出線，球迷開心，賣酒嘅餐廳東主就心情麻麻，因為無酒賣。本身俄羅斯過往十數年都對啤酒施行高稅率及嚴格管制宣傳，以致啤酒銷量未致預期，加上當地大多店家亦無特別為世盃事前準備啤酒存貨。遊客來到睇波，當然對啤酒的興趣大於Vodka，加上俄羅斯正處夏季，天氣炎熱，啤酒需求如火箭上升，莫斯科有酒吧東主就話，單係三日內，球迷就足足飲咗211加侖啤酒（即係800L），但最弊就係供應商出貨慢同唔夠存貨，市內有好多餐廳同酒吧都即將「無酒賣」，慘情絕對比「90分鐘被絕殺」更世界末日。

琴晚大家睇英格蘭大炒巴拿馬 6:1，睇到好開心，不過當地球迷就開始笑唔出，因為英國即將無啤酒飲，當地啤酒廠更有機會在一星期內，停止生產啤酒，原因竟然係二氧化碳供應減少？

首先要知道，二氧化碳是製作阿摩尼亞的副產品，而在啤酒釀造過程，二氧化碳的作用，創造一個缺氧的環境，有助於防止細菌生長，氣泡亦是碳酸化啤酒的一部份。每年夏天，歐洲多間氣體製造商都會關閉廠房維修，供應當然大減，英國受到影響首當其衝，因為國內僅得一間氣體製造廠房運作，呢個Timing 錯到啪啪聲。對於嗜酒如命嘅英國人，睇波無啤酒飲，又係一個晴天霹靂的慘況，此時此刻，笑得最燦爛嘅，會唔會琴晚輸波嘅巴拿馬總統？