餐飲集團BlackSheep旗下的餐廳，好似法式扒房La Vache!、新開日式居酒屋Fukuro、入選《亞洲50最佳餐廳》的法菜BELON，你實有聽過。最近呢隻黑羊首次舉辦餐廳週，一星期內用超值價錢食盡期間限定午市、晚市餐單，尤其是BELON，晚市套餐食齊6道菜只係$588，聽到都心動啦。

大家一見到 「一張圖睇晒集團有咩餐廳」一類post，先恍然大悟後作「起鋼」，大鬧霸權乜乜諸餘此類，我成日都話，唔使太過「妖魔化」集團式經營的餐廳，做人標準要睇高少少，因為香港其實仲有好多有心經營的餐飲集團。

我諗起一個名字，BlackSheep，呢隻黑羊旗下的餐廳，集中在中環、灣仔附近，正路你一定有聽過一間，例如獨沽肉眼一味的法式扒房La Vache!、復古美式漢堡店Burger Circus、中環最靚仔的印度菜New Punjab Club。

即將來臨的8月，BlackSheep就會首度舉辦「黑羊 ‧ 美饌」餐廳週，活動期間，食客可在集團旗下18間特色餐廳，用超值價錢享用期間限定午市、晚市餐單，或者店中的招牌菜式，價錢由$98 - $588不等，等你有機會食盡品牌旗下各樣風味的環球料理，感受背後獨特的餐飲哲學。

首先，平時不設訂位的餐廳以下開放訂枱，好似口利福、La Vache!、Chôm Chôm和全新開幕的日式居酒屋Fukuro，接受2至6位的預約，難得唔使等。

各間餐廳自然也端出招牌，口利福祭出「媽媽椰菜豬肉餃子」和入選《南華早報》本港最佳燒鵝餐廳五強的「惹味燒鵝」。要講當中最抵同最期待，莫過於今年榮登《亞洲50最佳餐廳》的法式餐廳BELON，晚市套餐食齊6道菜只係$588，已包其招牌菜「原隻烤走地雞配法式青豆」，平時可能係食到3個course… 仲有Buenos Aires Polo Club，5道菜連General Pico 純正黑安格斯肉眼扒，只賣$348/位，真心好抵玩，記得上去check下。

今年榮登《亞洲50最佳餐廳》的法式餐廳BELON，晚市套餐食齊6道菜只係$588，已包其招牌菜「原隻烤走地雞配法式青豆」

「黑羊‧美饌」餐廳週

日期：8月6日（星期一）至8月12日（星期日）

方法：由7月23日（星期一）上午11時起，顧客可登入 www.blacksheeprestaurants.com/blackseries ，揀選餐廳、日期、人數和時間，再填寫訂座所需的個人資料，即完成預訂。