港式奶茶你可能日日飲，師傅一手絲襪奶茶更是一門絕活，一杯好的奶茶，必先要經過焗茶、拉茶、撞茶等等，未飲就聞到茶香，口感滑溜，過後還有回甘餘韻。最近坊間出現一個識得自己沖調港式奶茶的機械人，聽講出品拍得住茶王手勢，係咪咁犀利先？

茶檔水吧，從來都係辛苦工，睇人住師傅抬手拉茶，接壺撞茶，種種細緻且複雜嘅手勢，你都會佩服傳承這手藝嘅師傅，只不過，水吧這行業越來越少人入行，業界多次表明，水吧師傅有著式微的危機，最近業界便搵到一個新方法，研發出一部懂得沖港式奶茶的機械人，個名相當趣緻，叫做「金仔」，不過就唔係玩核彈嘅。

「金仔係一部懂得沖港式奶茶的機械人。」香港咖啡紅茶協會副主席黃浩鈞Howard表示：「近年業界想招聘奶茶師傅都困難，所以協會今年聯同香港生產力促進局，合力研發出首部奶茶機械人。」金仔最主要的功能，就是以人工智能AI，代勞沖製奶茶的過程，包括沖茶、焗茶、撞茶的步驟。

金仔呢個高1.95米的機械人，睇黎唔似有咁強勁功能，不過根據Howard解釋，金仔研發超過半年，總投資額達200萬，絕對是協會的年度投資。

用機械取代人手，大家最關心都係金仔沖奶茶的速度，最快可以達到12分鐘9杯，與人手相若，仲有3種沖茶方式可供選擇。Howard強調：「金仔最厲害嘅地方，係可以好『人性化』地沖一杯奶茶，成套關節同程序，都係模仿人類沖茶嘅動作，例如舉高手拉茶，開完茶蓋要整走「倒汗水」，仲可以輸入各界不同金茶王師傅嘅數據，從而模仿師傅沖嘅好奶茶。」

問及研發過程最困難嘅地方係咩，Howard就話要將各個師傅唔同嘅手勢同功力，轉化為電腦數據，再透過機械臂重現，試諗下，連打圈注水等等極之細微嘅小動作，定係拉茶位置高低嘅習慣，金仔都可以實模仿呈現，他就說認為這亦是係最有趣嘅地方。

講到尾，金仔沖嘅奶茶好唔好飲？當我等完約14分鐘，當金仔做完沖茶、焗茶、拉茶、回溫等，我都相當期待。成品出來，一飲之下，茶溫夠熱，茶味夠濃，奶香稍遜，回甘至微澀，重口味人士最愛，仲要杯杯一樣。

「金仔」現階段只屬初步計劃，協會目標在明年之前完成第二階段研發，不過其實金仔早在上月舉行的美食博覽中「露面」，當時極受市民注目，未來大有機會量產，隨時在旺角記見到佢。