有「香港影視廚神」之稱的Chef Le Mon（藝名：謝霆鋒） 一向都是獨立特行，無論係整甜品，整威靈頓牛柳，你地班凡夫俗子根本就唔明白，早前同大陸麥當勞合作推出「星廚系列」的新包，大受歡迎，今次回歸香港，推出一系列「麥當勞X鋒味」The Signature Collection。新包上場，宣傳鋪天蓋地，萬眾期待，我地當然要睇睇實物啦。

連一向北上搵真錢嘅王祖藍，早前都話返香港拍「廣東話」賀歲片，大陸影圈嘅遊戲規則真係當你狗咁玩，Chef Le Mon唔知道係咪有受影響，好在佢好早之前已經喺大陸推出過「星廚系列」「霆鋒酷辣雞腿堡」，深受鋒迷歡迎。而今次吨創作靈感，霆鋒就話來自「回憶中的香港味道」喎。

「鋒味安格斯・煎蛋肉醬飽」 (10月26日起推出)

話說霆鋒經常在片場食嘅肉醬煎蛋飯，就將佢加入安格斯牛肉漢堡包，認真，肉醬同煎蛋其實有咩會錯？實物所見，肉醬容易漏出，味道唔算太特別，肉醬excat7y就係應該配白飯，煎蛋稍稍細咗D。

「鋒味洋蔥吉列豬扒飽」 (11月20日起推出)

呢個堅好食，格式化嘅吉列豬扒，外脆內軟，而重點係炒洋葱同炸洋蔥碎！！！口感酥脆又香口，加埋酸甜開胃的沙律醬，味道相當不俗。

「鋒味港式燒味風味調味粉」(10月26日起推出)和「鋒味避風塘炒蟹味調味粉」(11月20日起推出)

認真，港式燒味似燒烤味，味道再重少少。避風塘炒蟹味似「示畐」字麵包調味粉，同樣都係重口味。

「鋒味橙汁雜飲」(10月26日起推出)

「橙雜」是old school 的飲品，90後可能未聽過。

「鋒味菠蘿冰」(11月20日起推出)

無特別，菠蘿冰一杯。

「鋒味曲奇奶茶麥旋風」(10月26日起推出)

甜品可以唔使試，因為好似甜得濟。