令人上癮的呼吸聲孩之寶 Darth Vader頭盔！！

文：MenClub 魏文青　　
POSTED ON 14 Mar 2018

孩之寶(Hasbro)過去兩年先後推出星戰「白兵」與「黑兵」嘅1:1變聲頭盔，為普羅大眾提供一個性價比極高嘅「變裝玩具」。但講到《星戰》入面最出名嘅「頭盔」又點會係啲「兵」呀？一定係「黑武士」Darth Vader啦！而近日孩之寶終於宣佈會推出Darth Vader 1:1變聲頭盔，更加是系列第一個可以分離使用嘅頭盔！

今次推出嘅「Darth Vader Black Series Helmet」可以分為三個部件，首先係類似頸圈、附帶變聲裝置嘅底座；然後就係內外都充滿細節嘅面罩；最後先係覆蓋整個後腦嘅頭盔。三者以磁石連結，穩陣之餘裝拆亦相當方便。據知頭盔嘅變聲功能能夠將用家嘅聲音改成Darth Vader嘅「雞仔聲」，另外仲有「呼吸聲功能」。

其實呢個頭盔早於上年9月嘅Hascon就已經公佈，今次除咗有更多詳情，最重要係公佈會於今年四月開售，售價未定。各位Darth Vader要留意啦。