防彈少年團 (B.T.S) 呢一隊韓國組合都可以話係新世代嘅 K-POP 代表。出道五年多啲一段唔算長嘅時間，就已經紅透全世界，Fans 遍佈全球。

南韓本土就不在話下，日本，香港，中國等亞洲地區亦有眾多 Fans 支持，特別係如果你去日本有行經 Tower Recors嘅話，佢哋嘅專輯都經常被放喺當眼位置，撞正出新碟或者有Concert嘅更加會大肆宣傳！

唔單止亞洲地區，歐美地區亦為之瘋狂。其中，防彈少年團更喺美國打下唔少紀錄，揚名立萬。喺佢哋出道嘅第三年，亦即2016年，B.T.S. 就以第二張正規專輯《WINGS》，成為咗第一個以韓語正規專輯登上美國iTunes Top Album Chart嘅韓國歌手單位，更加喺Billboard 200以第26名刷新韓國團體最高紀錄，更加威水嘅係只係發布7小時後就登上美國iTunes專輯榜冠軍，成為第一個以正規專輯創下呢個紀錄嘅K-POP團體。自此以後，防彈少年團喺美國嘅風頭可以話係一時無兩，基本上每次出專輯，Billboard都會有佢身影。

就喺上個月推出嘅《Love Yourself 結 'Answer'》專輯嘅宣傳期期間，BTS更宣佈同美國著名女Rapper Nicki Minaj 合作，共同演釋專輯當中嘅 "IDOL" 一曲，雖然只屬「特別單曲」，冇收錄入專輯，但已經成功引起話題啦。佢哋更加以呢首「特別單曲」，成功喺9月4號，以第11名嘅姿態打入Billboard Hot 100，除咗宣傳效果，更加嬴盡掌聲。