由舊年開始話會推出嘅Switch Online 服務，早前話今年第三季會推出，而任天堂正式宣佈會喺今個月嘅19號(星期三)正式推出哩款服務。有玩過其它主機嘅Online 服務都知，哩啲服務一定唔係免費，咁一直以嚟免費用緊哩項服務嘅機主們，點解要畀錢買哩項服務呢？等我哋睇下有咩咁特別啦！

在商而言，推出一款額外嘅服務有所收費係無可口非。現今世代，online對戰係一個必備嘅服務。你都唔想個online server 唔穩定又唔順㗎，畀少少錢就可以買個穩定(都要睇正式推出後嘅情況而定)，一年畀百幾蚊又唔算貴丫！

在玩家而言，哩款係增值服務，同你買完隻Game 再買DLC 差不多，但可以買到5個服務，算係咁啦。

1) Online 對戰：雖然哩款服務一直免費畀大家用緊，但一直以嚟，回應都係麻麻，希望收咗錢之後會好啲。

2) 免費NES遊戲：小熊一直覺得，Switch 不斷翻炒冷飯，小熊一早稱佢為官方模擬器，依家老任真係推出哩項模擬器服務，可以免費下載當年紅白機(Famicom)，暫時嚟講一個月會推出三款，十月份就有：所羅門之鍵、熱血高校閃避球同埋Mario Golf。

3) 雲端儲存記錄服務：一直以嚟，Switch 嘅SAVE只可以保存喺部主機入面。如果部機咁唔好彩壞咗或者唔見咗部機，一直努力嘅心血真係...依家推出雲端儲存服務，畀大家一個保障。

4) Switch App：相信係機主都知，部Switch 係無「咪」嘅，仲要無得駁藍芽通訊設備，最絕係連有線耳機連咪都無，所以要同朋友邊傾邊玩，根本無可能。唯有用第三方解決方案，出一個電話app去解決本身主機設計上嘅缺陷，如果唔係本身機自帶嘅話，我用電話傾會唔會穩定啲呢？再唔係開Skype 多人會議都得啦！期望佢有更創意嘅功能。

5) 會員福利：算係會員福利？係會員先可以訂購嘅產品！如果用到金幣換就真係會員福利啦⋯⋯

價錢方面，以日本server 為例，300円可以玩30日，最抵梗買年費會籍啦！2400円，即係港紙大約港紙168蚊(7算計)左右，比其它主機平，重點係每個月都有紅白機嘅舊game 玩，平均每個月畀14蚊買啲舊紅白機game  懷緬一下，都算玩得過嘅。同埋真係搵齊到8個人做大家庭嘅話，平均40蚊就玩到一年嚕！

美國果邊亦同步喺18號(時差關係，無特別早咗)推出Nitendo Switch Online 服務。

對紅白機有返咁上下資歷都知，美版主機同手掣都唔同樣，所以會員限定品都有所不同。

美國server 平啲，156蚊就買到一年會籍，同買電子版game 情況大致相似。不過服務同免費game 有機會唔同。

日本嚟緊3個月嘅Game list

雖然依家暫時三個月嘅game 都係一樣，但日本同美國嘅口味唔同，啲game 遲啲會有分別都未頂，建議跟返自己口味去決定join 邊個server，唔好只因為平果十蚊八蚊，到時轉嚟轉去。

以紅白機嘅game 量，暫時官方發佈只屬少量，以前啲game 出名襟玩同可玩性高，唔知Switch 會唔會真係成為官方模型器呢！(小熊期待忍者龍劍傳同埋熱血系列)