車路士領隊沙利日前確認，續約比利時中場夏薩特係佢目前嘅首要任務，佢非常希望未來仍然可以見到夏薩特喺史丹福橋效力。

沙利明確續約夏薩特係佢現時最重要嘅任務，特別係夏薩特一直都希望加盟皇馬，雙方走得好埋，而皇馬亦希望可以得到「夏神」以頂替C朗離開後嘅位置。

對於續約夏薩特，車路士絕對係誠意十足，佢地願意為呢位中場開出球隊隊史最高嘅30萬鎊週薪，亦即係將會比簡迪嘅29萬鎊週薪更高。

現時「夏神」與車路士嘅合同將於2020年夏天到期，亦即係話來季將會進入佢嘅合約年，如果車路士未能及時與佢提前續約，咁樣佢嘅轉會費將好大機會下跌，最壞嘅情況係佢可以喺2020年夏天免費自由轉會。

現年27歲嘅夏薩特係車路士嘅頭牌球星，今季佢喺英超暫時交出7入球5助攻，兩項數據都排名球隊第一，而車路士則以31分排名聯賽第3位，落後榜首嘅曼城10分及第2位嘅利物浦5分。