曾經引起全港(甚至乎全世界)各人瘋狂咁跑，一度係人氣熱話嘅手提電話遊戲《Pokemon Go》最近發放咗一個幾重要嘅消息，就係終於可以轉去唔同顏色嘅隊伍。

雖則遊戲已經無當初咁，有咁多人咁瘋狂，不過遊戲一直都有Keep 住更新，保持各位精靈訓練員嘅新鮮感，所以到依家喺唔同道館嘅位置，都會見到一大班人聚集喺度狂篤部電話，打團體戰。今次嘅更新絕對係可以令一啲唔玩嘅人有回歸嘅衝動，因為之前揀錯隊嘅朋友，終於可以轉去同屋企人、朋友同一顏色啦!相信可以引起一班覺得自己孤立嘅人士，有心機去玩多啲。

眼看代價都唔低，因為每年只可以轉一次，而個轉隊章要一千個金幣，唔計喺遊戲入面坐館，真金白銀課金的話，最少都要畀78蚊買千二個金幣先買到，值唔值就好睇大家會唔會課金啦!不過可以同親友同一隊，遊戲樂趣都會大增，少少錢都值得畀嘅。

同期更有翻炒「拉帝亞斯」特別周(2月23號~3月1號)，翻炒一下妹妹，重要嘅係，翻炒佢就開放埋佢嘅色違版，把握哩個特別周去捉一下色違，照推斷，再下星期應該會到哥哥翻炒?

而三月社群日都一早通知，由於木守宮無「絕學」，所以呢，今次社群日吸引力比起之前嘅吸引力都略低。不過吸引下大家唔好宅喺屋企，多啲同親友外出都好嘅，不過時間就推遲到15:00~18:00，老手反而要注意下。

另外遊戲登入畫面喺最近嘅星期日當天更新，加入之前講嘅AR+ 影相功能，而登入畫面亦更新咗，即暗示「圖圖犬」會開放，睇下到時會點樣嘅形式登場。