手提電話遊戲(俗稱手遊)，近年氣勢真係一時無兩，而且好多都賺盤滿缽滿。傳統嘅家用/手提主機嘅生廠公司，都想分一杯羹，但事實係，摺完一個遊戲又摺另一個遊戲，日本限定嘅遊戲《數碼暴龍 連結2》(Digimon Link2) 將會喺7月完結，Server 將會摺埋。

相信好似小熊咁，都係八十後嘅，《數碼暴龍》哩個品牌絕對唔會陌生，由以前「數碼暴龍機」，WS，玩到近年PS4 都有唔錯口碑，但只要玩課金式，就出咗問題。哩隻Game 小熊都玩過一排，遊戲畫面係唔錯嘅，有PS2 級數嘅畫質，數碼暴龍量亦相當豐富，何解會摺埋呢？以下小熊有些少個人見解。

1）封鎖地區：只可以喺日本App Strore / Google play 入面先有，雖然可以有方法可以解決，但大部份人都唔會搵到隻遊戲，間接減少咗玩家量

2）SERVER 經常停機：以前PC PS 年代經常遇到嘅問題，定期每星期停機做維護，相信哩樣嘢喺手機遊戲界係一個麻煩嘅地方，手機遊戲就係拎起手就玩得，拎起又停機，仲要停幾粒鐘，真係轉GAME玩第二啲

3）唔課金玩唔到落去：我玩咗兩三個星期，日日都掛機，打咗咁耐，只係進化到一隻完全體，究極體一隻都無，即係話，唔課金，進度極慢，點解會咁慢？事關行動值、進化需要嘅訓練、進化碎片，全部都係要去打任務，即係無課金就要等，而成功感非常低。

4）玩法過分單一：雖然用咗大熱嘅農場模式，但目的唔係幫助玩，而係要嚟卡住進度，無乜乜乜就唔可以訓練，得肉田係真係有用......而對戰部份就用上時間回合制，3VS3。儲下氣出招，就無啦！打後少少啲數碼暴龍成長期都勁過我哋啲完全體，即係又要合體退化再升返上去，卡關之極。

B廠我玩過嘅都有三隻game 摺埋咗，除咗哩隻仲有兩隻SD Gundam，真心幫唔落，如果我真係有課金落去，我啲成績喺佢熄機果下就會化為烏有...

拜拜！