之前我哋提過《數碼暴龍》動畫踏入20周年，所以都不斷有新產品推出，同時 G.E.M. 系列10周年紀念，精心推出最新產品。其中喺邪氣十足嘅角色，要討好嘅無乜，唯獨「墮天地獄獸」人氣度極高(香港版配音員更為保全叔)。作為七魔王之一，實力同外型都令人相當無抵手抗力，今次G.E.M. 所推出嘅景品，更加係以渡辺けんじ先生（渡邊健史老師）插畫為藍本，加上名為「BEHEMOSU」嘅電單車，又邪又型棍。

哩張廣告相認真一流，如果喜愛墮天地獄獸嘅朋友，絕對會係心花怒放。完全唔似奸角，好似戰隊黑色衫果個朋友咁。

作為景品，造型係重點，其次就係上色部份，可以睇到哩隻墮天地獄獸上色絕不馬虎，靴上嘅金屬扣都重現到金屬質感，擦邊嘅陰影色，布料與金屬部份嘅交替表達清晰，頭頂嘅紫色(頭盔？)表現好搶眼，帶點金屬感嘅光滑效果，非常好。

架電單車亦唔馬虎，金屬部份，車胎，包住死氣喉嘅布，以及電單車上嘅手柄，完全係精品級真實感呈現。等別係透明嘅車頭擋風板以及咪標，為整個景品帶來一點透明嘅剔透感，平衡咗一下整隻成品嘅沉重感。

造型、上色以及細節都表達得唔錯，如果賣街時有八成水準，絕對係Fans 必收品。雖然價錢係貴咗啲，不過數碼暴龍嘅產品又要咁高質，真係唔多，墮天地獄獸更加少見，買唔買得過就睇你有幾愛啦！

G.E.M. 墮天地獄獸 & BEHEMOSU 電單車 上色景品組合

派送日期：2020年3月預定
售價：35,000円(未連稅)
Size：全部～180mm，全長～300mm
質材：PVC、ABS
產地：中國