依家唔少遊戲都有非常精彩嘅過場動畫，甚至連過場動畫比起隻遊戲本身更加有趣都唔係罕見嘅情況，然後你再望下嗰堆所謂真人版電影，有時真係忍唔住諗：「你播返啲過場動畫黎我都冇咁嬲」。而Netflix近日就宣佈會推出《Resident Evil (Biohazard)》全CG作品，睇落又真係好似啲過場動畫咁喎！

圖片：IGN

呢套CG作品名為《Resdient Evil: Infinite Darkness》，最早係由葡萄牙Netflix官方Twitter錯手提早公開，後來先喺Capcom嘅東京遊戲展 2020 直播中由系列製作人小林裕幸正式公佈，同時亦發放下面呢條預告。但目前有關系列嘅資訊相當少，淨係知道會由深受大眾喜愛嘅二代主角Leon及Claire為主，但劇情係咩就暫時未知。

值得一提嘅係，8月時Netflix亦公佈會開拍真人版《Resident Evil》劇集，但當時嘅消息指劇集會圍繞「Wesker家的孩子們」展開，相信與呢套CG版作品冇咩關係。而對上一套《Resident Evil》嘅全CG作品要數到2017年嘅《Resident Evil: Vendetta》。