事前篇：

1.定時定侯上鞋油
鞋油本身就係油，小學時老師都有教你，水同油係撈唔埋，所以鞋油有阻隔水份的功能，而鞋油更加有滋潤皮革之用。因此，傳統上教大家護理皮鞋，都一定係教你上鞋油，而雨季期間，最好兩星期上一次做足準備。

2.出街前噴防水噴霧

近年皮鞋與波鞋價格不斷上漲，不少外國品牌有見及此，便為鞋履推出護鞋用具。其中有支防水噴霧，在家中噴定2-3層，便會像鍍膜般隔去雨水，最犀利係，連麂皮都可以用到！

Reshoevn8r 防水噴霧 $168

Reshoevn8r Shoecare Centre
地址：旺角油麻地彌敦道566號地下A3後店（油麻地地鐵站A2出口）

3.幫皮鞋打膠掌

很多時雨水催毀一對皮鞋，都唔係由鞋面，反而係鞋底出事。傳統買來的昂貴皮鞋，大都是皮底鞋掌，未必會事前加上防滑膠掌，以保留古典的皮鞋味。但皮底鞋掌的皮鞋，若遇上接連暴雨，鞋底浸足一日，之後好可能會皮底發霉。為著實際著想，為鞋底打掌，行商場啲雲石路既防滑，落雨著用又有一定程度防水，why not？

事後篇：

1.自己擺乾，切勿用風筒吹
皮鞋遇水後，其實會變得好脆弱，如果強行用風筒吹乾，極速令皮革收水，只對令皮鞋的壽命短好多。所以慢慢擺係屋企通爽嘅位置，等佢自然乾先著。

2.加入鞋楦、報紙吸濕

如果係愛鞋之人，相信屋企都梗有幾對鞋楦(shoe tree)旁身，若果冇的話，民間土法亦都會用報紙放入鞋裡面吸濕。不過話時話，仲有幾多人屋企會有報紙呢？

3.發霉就用洗皮水

若果對鞋經歷漫長的暴雨，一些淺色的色革可能有會水漬，甚至發霉。呢個時侯就要洗皮水抹一抹，或者用酒精輕輕拭擦。至於水漬，最簡單就用同色的鞋油補上去。

4.Second shoe來替換

雨季就來，通常一落就落幾日。在第一對鞋未乾透之前，不妨俾佢休息一日，著第二對去輪流交更，那兩對珍貴的皮鞋相信能穿上十年八載都冇問題。