《The OA先見之明》點解會拍得成？據說導演Zal Batmanglij 同女主角Brit Marling 揸住個劇本去敲Netflix嘅門，唔單止毛遂自薦，而係由女主角親自演一次畀 Netflix嘅人睇，裡面嗰隻曉有含意嘅「古怪舞」同埋故事都係由女主角同導演親自創作。佢哋兩個唔係第一次合作，之前合作嘅作品都同New Age有關。 

《先見之明》故事講嘅係一個失明嘅女仔，細個畀養父母帶大，到少女時代離家出走，其間失蹤，7年後失明嘅女仔可以睇到嘢，故事就係講嗰7年究竟發生咩事，中間原來牽涉到一場實驗，一個科學家企圖探索死後世界，於是捉咗幾名男女做人體實驗，用儀器浸到啲人窒息，等佢哋就死之際睇下去唔去到死後世界一窺究竟！ 

故事局中有局，已經估唔到跟住發生啲咩，亦都加咗好多New Age元素，例如係講死後世界，講一啲舞蹈動作可以造到一啲奇異能力，故事疑幻似真，講到最尾都分唔清究竟係女主角自己精神病太多幻想，定係真有其事，最尾一集嘅結局極度出人意表，完全估唔到會咁樣埋尾。 

好多觀眾鍾意《先見之明》，就係鍾意佢感覺上第一季就已經好完整，唔一定拍第二季，個故事已經有頭有尾。但Netflix見到第一季頗受歡迎，於是當然唔會錯過機會，第二季已經拍緊，都係用返原班人馬！本人係極度期待！