唔經唔覺又到秋季。好多人都已經扲定D長䄂衫岀嚟著，護膚同衫都一樣當然都要轉季啦。

【無限保濕】

其實保濕真係離唔開護膚，夏天要保，冬天更加要保，仲要加強保濕。因為冬季濕度下降，肌膚嘅水分容易流失，令皮膚變得乾燥同繃緊。所以係選用護膚品嘅時候，應該選用高效保濕嘅産品。可能你又會話「我夏天嘅面霜已經好保濕喎，仲需唔需要換？」如果夏天清爽型面霜係冬天用完冇出現缺水出油情況，當然可以繼續用，但如果搽好快就覺得乾，咁就最好換款高保濕嘅護膚品，或者再搽多層面霜，加強保濕效果啦。

【甩皮爆裂嘴】

由於嘴唇唔似皮膚，無皮脂腺分泌油脂保護，所以嘴唇特別容易乾燥、脫皮，甚至爆裂。所以冬天一定要有一支潤唇膏傍下身。你都唔想你嘅另一伴同你錫嘅時候好似錫落張沙紙到架嘛。另外都要記得定期做唇部嘅磨沙，去走嘴唇上嘅死皮，踢走甩皮爆裂嘴。

【防曬又關事】

對抗紫外線嘅傷害每日都會有，紫外線並唔會因為季節而減少，雖然冬天個個包都實一實，不過都唔可以忽略面部嘅防曬，所以防曬措施都一定要做足。減少皮膚被紫外線傷害，皮膚就無咁容易老化啦。

【咪用熱水洗面呀】

冬天熱水洗面係咪好舒服呢，不過洗得多並唔係一件好事。因為過熱嘅水會傷害角質層，令皮膚容易鬆弛，其次毛孔增大導致皮膚粗糙。所以再凍都好千祈唔好用過熱嘅水洗面，正確嘅做法就係用低於人體體溫嘅水嚟洗面就最合適。

【面部磨砂做唔做】

做！緊係做啦。不過切記唔好頻密咁換膚同去角質，因為冬天皮膚容易變得敏感，始終換膚同去角質都帶有傷害，所以最好都唔好經常做，避免過度傷害皮膚，而且應該選用較温和嘅去角質產品，減低皮膚嘅傷害。