雖然而家嘅3D打印機已經好普遍，而且印出嚟嘅3D物件都非常精細，但對於一班麻省理工學院(MIT)嘅研究人員嚟講就仲未夠細喇。MIT日前透過對腦組織造影嘅逆向工程(Process for imaging brain tissue)，研發出可以將各種物料、形狀嘅3D物體縮小至原來嘅千分之一大小，可以去到納米咁細。

MIT嘅研究人員首先創造咗一種由聚丙烯酸酯(Polyacrylate)製成嘅支架，其實係一種可以喺尿片搵到嘅吸收性材料。研究人員將製成嘅支架結構浸泡喺熒光素分子(Fluorescein Molecules)嘅溶液中，當曝露喺光線下時，熒光素分子就會附喺支架上，之後研究人員就可以用激光槍重置任何粒子位置，包括遺傳物質或金屬物質。

而為咗進一步縮細物質嘅結構，研究人員用咗一種酸去阻隔Polyacrylate嘅負電，迫使佢進行收縮。而目前呢種技術相當有發展潛力，研究人員認為技術可以應用於顯微鏡、電話光學元件，或者係機械人所使用嘅納米零件等。

來源：Engadget