日前 Apple 向美國科技媒體 Axios 證實，已經成功收購咗一間陷入困嘅自動駕駛初創企業 Drive.ai，並聘請咗 Drive.ai 幾十名研發工程師。早前有報道指出，Drive.ai 曾經被估值為兩億美元，不過 Axios 未有透露今次收購嘅具體金額，但可以反映 Apple 仲未放棄自動駕駛汽車領域。

其實不久前，就已經有外媒報道過 Apple 曾經接觸過 Drive.ai，並希望進行收購，不過今次 Apple 嘅收購目的係為咗獲得對方優秀人才，而唔係某個產品或者品牌。Drive.ai 其實係一間美國加州嘅自動駕駛初創企業，由知名 A.I. (人工智能)專家吳恩達團隊於2015年建立，主要研究透過深度學習提高自動駕駛汽車喺行駛中辨認道路物體能力，減低發生碰撞機會。

喺今年年初 Apple 曾經向自動駕駛部門開刀，裁減咗200多名員工，有部分工程師被調至其他 A.I. 項目，令唔少人認為 Apple 要放棄自動駕駛汽車領域。Apple 喺自動駕駛領域上有唔少競爭對手，包括 Waymo、Uber 等，而且美國加州車管局統計數據顯示，喺所有提交數據嘅20多間自動駕駛路測企業中，Apple 自動駕駛模式脫離率方面排名倒數第一，唔知今次收購 Drive.ai 可唔可以幫助 Apple 急起直追呢！

來源： 9to5Mac