作為英超和波最多嘅球隊，本來曼聯爭前四已經無希望，估唔到前四競爭對手阿仙奴、利物浦同曼城自己唔生性先後脫腳，加上贏埋榜首車路士近幾場追下追下，曼聯又重返爭前四爭奪戰；另一方面，歐霸盃八強對安德列治要出盡九牛二虎之力先僅僅出線，但就有洛祖同首席射手伊巴謙莫域重傷收咧，對處於賽季關鍵時刻嘅曼聯穿黎講絕對係嚴重打擊。就喺呢個時候，養傷多時嘅朗尼終於復出，身為隊長又支緊高薪，外間對朗尼嘅要求不嬲就好高，而近幾季佢嘅表現就真係差強人意。而家球隊正值用人之時，或者就係月巴用行動叫批評者收聲嘅最佳時機。

朗尼喺星期日對般尼嘅比賽終於復出，仲同今季發展一樣唔順利嘅馬迪爾一人入一球，協助球隊作客贏今季主場成績唔錯嘅般尼2-0。摩連奴係後費格遜時代第一位夠膽將朗尼長放後備嘅領隊，事實亦證明就算佢冇上陣，球隊嘅表現都係差唔多甚至更好。所以即使朗尼已經超越卜比查爾頓成為曼聯入球最多嘅球員，不過肥仔季尾離隊嘅消息此起彼落。其實朗尼身為曼聯兼英格蘭隊長，喺呢隊咁年青嘅曼聯中絕對有領頭羊嘅作用，尤其依家「呂布」受傷，佢就更加要負起帶起球隊士氣嘅重責。而復出一仗取得入球，亦證明自己能力上依然可以帶領球隊。希望肥仔可以把握機會重拾狀態爭取表現，就算下季伊巴復出，曼聯都多一個可用之將。

講返伊巴傷勢，伊巴出晒名身體質素高，職業生涯無點受過重傷，估唔到少有嘅一次就畀咗曼聯。賽後報導拍伊巴右膝兩條前十字韌帶都斷晒，休養相當需時。呢次重傷對曼聯以及伊巴黎講都係非常唔合時，一方面球隊少咗個射手，另一方面已經35歲嘅伊巴只係同曼聯簽咗一年約，外間都好擔心呂布可能會因傷需要退役。但佢本人就繼續霸氣，喺Instagram 回應指「放棄從來唔係佢嘅選項，好快就會同大家再見 (Giving up is not an option. See you soon)」。 一個職業生涯去到尾聲嘅球員仲有咁驚人嘅鬥心，實在值得年青球員學習。

曼聯歐霸盃四強對手將會係西甲嘅切爾達，雖然切爾達喺西甲嘅表現相當一般，而家只係排第十，但佢哋非常重視歐霸盃，而且過往曼聯對西甲球隊嘅往績一向唔好，所以曼聯想出線都唔係咁易。加上傷兵問題越黎越嚴重，摩佬都真係幾頭痕。朗尼喺呢個時候復出，一方面為球隊增加可用之兵，如果可以帶領球隊捱過呢個難關，相信好多之前批評過佢嘅曼迷，包括我，應該會對佢刮目相看。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。