一再回味的皮革
阿韜喜歡Vintage,現職是牛仔褲品牌的Visual Merchandising,他認為牛仔褲、皮革等等復古玩意,都是愈耐愈有味道。尤其是皮具,無論在潮流或使用度,都非常經得起時間考驗,大多數例子都說明,他們可以伴隨你幾年,甚至幾十年,所以,在款式和功能等方面,阿韜都堅持皮具要貼合使用者的生活和性格,只有這樣,才足以令人再三回味。這亦是阿韜的品牌——Returns Leather(回革)的宗旨。
雕吓雕吓雕上癮
老老竇竇,阿韜初接觸皮革雕花,心底覺得這東西非常老套。因為時下興簡約,作為年青一代的阿韜購物時也會選擇簡單的款式,他直言皮革雕花十足「阿媽衣櫃入面先會有嘅圖案」,娘到爆。當年興起念頭,純粹為配合大學課程的Project,只好試吓雕,點知雕雕吓就雕上癮。
歷史悠久的唐草
阿韜嘅皮革雕花以最經典的唐草為主,有較多枝葉同流動效果。咪以為呢啲花花草草只有女士鍾意,原來好多買家都係大男孩或男子漢。皮雕當初由歐洲傳到美國,最盛行的時期已回數到西部牛仔年代,當時流行以皮雕作嘉勉,成就愈大,牛仔的槍套、馬鞍等位置的皮雕就愈華麗。不少酷愛西部牛仔文化,或刨開日本雜誌的男士,都特別鍾愛皮革雕花,覺得復古味濃,咁先至有型。
為惜花之人而雕
皮革雕花一睇就知係精緻工藝,而雕刻過程亦相當繁複。阿韜之所以唔將皮雕當正職,正因為皮雕需長時間集中精神,並要細心雕刻敲打,平均一個短銀包(只雕面計算)已耗4至5小時,長銀包(只雕面計)需6至7小時,因此,產量一定不多,成品少自然不足以維持生計。而且,阿韜享受在無壓力的情況下做自己喜愛嘅皮雕,一旦將之變成正職,相信會徒添壓力。因此,阿韜只將皮雕當副業,為皮雕的識資之人雕那花。