| |
今季曼聯成績不濟，單單為爭歐聯席位就被折騰一季。不過上星期四晚歐霸盃四強1-1賽和切爾達後，曼聯就會喺5月24日飛去瑞典斯德哥爾摩同阿積士爭冠軍，歐聯席位算係叫緊糊。賽前摩連奴話主場對切爾達嘅比賽係曼聯歷史上最重要嘅比賽，就算你唔係曼聯球迷，都知道老豆係吹大咗，甚至有網民話曼聯史上起碼有50場比賽比呢場歐霸盃四強次回合比賽重要，邊50場我就唔知，不過我就揀咗幾場我認為曼聯近30年幾重要嘅比賽，睇下你哋又同唔同意。 | |
| |
| 1）1989-1990年足總盃決賽重賽（對手：水晶宮） 而家講起費爵爺，大家都會話佢係紅魔嘅傳奇領隊，之但係佢剛由鴨巴甸加盟曼聯嘅日子並唔順利。去到1989-1990年球季，雖然球隊喺英甲接近降班邊緣而董事局又表明唔會解僱費格遜，不過sir當時仍然被睇死當足總盃第三輪輸俾聯賽氣勢如虹嘅諾定咸森林之後，費sir就會被炒，但點知曼聯喺嗰屆足總盃表現相當出色，一路過關斬將，直到決賽對上四強淘汰利物浦嘅水晶宮，雖然首次對決兩隊3-3打和收場，但重賽曼聯以1-0擊敗對手捧走費格遜時代首個錦標。雖然費sir捧盃後仍然被睇死唔會贏到聯賽冠軍，但如果曼聯當時贏唔到呢場波，費格遜皇朝都好大機會唔會有27年咁長。 | |
| |
| 2）1998-1999 歐聯決賽（對手：拜仁慕尼黑） 呢場波都唔識，真係枉為球迷。當年曼聯英超只輸三場，1999年後更係聯賽不敗，足總盃氣走紐卡素奪冠，只要歐聯決賽搞掂埋拜仁慕尼黑，就可以成為英格蘭首支完成三冠王嘅球隊。當年曼聯嘅歐聯之路一啲都唔好行，沿途遇上祖雲達斯、巴塞隆拿、國際米蘭等勁旅，去到決賽，好不幸拜仁喺開賽6分鐘就先開紀錄，戰況一直以1-0膠著。隨住時間過去，拜仁全隊都認為冠軍在望，可惜喺補時階段被舒寧咸同蘇斯克查雙重絕殺反勝拜仁奪冠，90分鐘努力只需兩分鐘就被摧毀都咪話唔傷，而曼聯就成為到今日為止唯一一隊英格蘭三冠王。 | |
| |
| 3）2015-2016 足總盃決賽（對手：水晶宮） 同26年前費sir第一個足總盃一樣嘅對手，而時任領隊雲高爾同樣被離隊傳聞困擾，如果呢場波贏咗，足總盃就係後費格遜時期第一個錦標，所以係相當有意義。不過曼聯嚟到決賽，運氣都佔有相當重要嘅部份，因為直到決賽嘅對手都唔算太強。而呢場波雙方實力雖然懸殊，但直到78分鐘先由翼鋒賓哲安先開紀錄，但好彩3分鐘後就由馬達追平1-1。直到加時110分鐘最聯再由「溫布萊之子」連加特入球反勝。呢個後費格遜時代第一個錦標真係得來不易，只可惜雲高爾即使贏到足總盃，都唔可以好似費格遜咁留效曼聯，因為英超只排第5，來季曼聯只可以參加歐霸盃，呢場波後3日曼聯官方就宣佈雲高爾離隊嘅消息了。曼聯史上嘅重要比賽當然唔止咁少，其他嘅就需要各位Gentlemen幫手發掘下。 | |
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員 由懶到出汁變成泰拳愛好者 除咗足球最鍾意就係睇戲、睇書、飲兩杯 唔求發大達，最想成為有些少生活品味嘅偽文青。 | |
