| 學《火腩飯》潮文話齋，望唔清呢個世界有幾多嘢係掌握到會好迷茫，所以睇得透真係好重要。最近美國密西根州立大學就有班研究人員，成功製造出完全透明嘅太陽能收集器，透到直頭用嚟取代玻璃窗都得，採集太陽光嗰陣，都唔會阻你睇風景！ | |
| |
| 呢款透明收集器會專門吸收太陽光中嘅紫外線同紅外線，然後傳送到透明物料邊緣嘅薄條狀太陽能電池，從而產生電能。 雖然香港成日都猛太陽都曬死人，但係冇咁多地方放置傳統嘅太陽能收集板，所以太陽能發電喺香港一直得個講字。但若然有咗呢隻全透明收集器，用晒嚟當商廈嘅落地玻璃嘅話，夠供電畀全幢大廈用都唔奇。 | |
| |
| 最正仲係理論上連手機、平板電腦都用到呢款太陽能收集器嚟造芒，第時大家可能唔使再靠「尿袋」，都可以有額外電源供應。不過目前離呢款收集器正式用得都仲有一段時間，因為班研究員仲要諗計將太陽能轉換率提升，令到佢可以產生更多電力。 |
