讀書好就咩都好
無論以前定現在，大家都認定讀得書=叻/好/乖，然後忽略小朋友其他才華同優點，甚至做人嘅品格同態度。

讀書期間唔可以談戀愛
好明白父母會擔心小朋友心智未成熟，談戀愛會帶來好大影響，但人心肉造，感覺要來都擋唔住，與其夾硬破壞孩子小小嘅戀愛心靈，更應該好好同佢溝通，等佢唔會因為怕畀父母鬧而唔敢出聲，搞到胡思亂想又鑽牛角尖，唔識處理戀愛問題。

讀書唔好嘅係壞朋友
讀書好似乎喺呢個世界上真係大晒，只要對方讀書好，就算佢人品幾cheap，父母都想推你同佢玩；但如果對方讀書唔好，無論佢心地幾善良幾孝順幾老實，佢都會被父母定義為「壞人」。

屋企條件好就嫁得過
仲記唔記得「公屋潮文」？好似只要家境好、有錢就係戶好人家，可以嫁得過。但其實好多好男仔，就算冇咩錢，都可以畀到幸福老婆。

父母可以隨便睇孩子嘅物品
就好似當小朋友係自己「附屬品」咁，覺得自己係佢阿媽/阿爸，有咩唔睇得？但事實上，呢個世界真係有「私隱」呢樣嘢。

父母係「過來人」所有睇法都冇錯
「我食鹽多過你食米」，所以唔會睇錯人，唔會做錯決定。不過世界上都有樣嘢叫「偏見」，更何況好多時父母都係睇表面就話睇通睇透。

父母係「為你好」所有決定都冇錯
父母當然會想為你好，話晒你自己小朋友，點會想佢死？但係真正為對方好，當中理應包含「尊重」，好多時家長對小朋友嘅思想同意願，就係少了份尊重。