考試並唔係單單靠背書就可以攞高分，好多時老師出嘅考題都鬼咁刁鑽，簡直變成腦力大測試！不過淨係考你IQ高唔高都算，最爆係有時啲老師仲要喺試卷上同你嚟一場心理戰術……大佬！我都係想安安份份考個試Pass咗佢啫……畀條生路行下啦……Any肥，日本北海道大學就有個學生喺期末考試時遇上一條難題，呢條題目表面上係數學題，實質暗藏各種心理攻防術，真係唔知點答先好。

網民藍川陸里喺Twitter上同大家分享北海道大學期末考試嘅一大難題︰

「由1到100中寫出其中一個你鍾意嘅數字。只要喺唔會同其他同學答案重覆嘅情況下，寫出最大數字嘅人就可以加60分。」

由1到100，最大嘅數係100，但呢個常識係人都知，同其實人答案重覆嘅機會都相當之大，咁呢題應該點答好呢？

呢條咁有趣嘅題目吸引唔少網民圍爐解答，有啲人就話「99.9999999999.....」呢類加小數點嘅數，有啲人就話所謂「最大數字」咪係寫大隻啲隻字，大家都有不同見解，巴打你又覺得呢題應該點答？