| |
如果唔識籃球嘅朋友，睇到「夢幻舞步」呢個Term，相信唔多唔少都會諗左去跳舞，但係其實呢個係籃球入面嘅一個用語，雖然佢唔多唔少都真係好似跳舞咁動作多而變化大，但係就梗係唔係跳舞，而係籃球比賽入面嘅一系列動作。 | |
| 「夢幻舞步」其實無實際一個指定動作，佢嘅來源就係黎自前火箭傳奇「大夢」Hakeem Olajuwon，當年因為Olajuwon喺籃底下嘅高超技術，動作有如行雲流水一樣，所以就將佢嘅籃底技術稱之為「夢幻舞步」啦。 | |
| 「夢幻舞步」究竟有幾夢幻，其實真係好難話到你知，一定要睇片先可以品味到佢個種震撼。以Olajuwon黎講，佢無論喺籃底邊一面進攻都係得心應手，而佢永遠唔會走步，但係佢就會利用假身、轉身、假投黎將對手完全咁呃到，要知道佢個陣嘅時代籃底下有幾多怪物，但係佢就單憑夢幻舞步成為當年四大中鋒之首，同時亦成功喺Michael Jordon離開NBA嘅兩年時間中為火箭帶黎兩次總冠軍。 | |
| |
| 其實「夢幻舞步」最重要嘅係腳步，首先你要避免走步，之後就要諗下究竟配合點樣嘅腳步先可以避開防守得分，呢一點就需要球員自己喺場上判斷，可能可以係一個轉身，亦都可能係一次來回轉身，總之就需要你單憑自己嘅經驗決定下一步。 | |
| 對於「夢幻舞步」嘅威力有幾強大，其實只要睇下「大夢」退役後佢旗下有幾多弟子就可以知道。首先當然要數湖人傳奇Kobe Bryant，呢位超強得分手本來已經稱霸NBA，但係當知道自己身體質素開始下降時，便去搵上「大夢」以便學習籃底技術，最終好快佢就將「夢幻舞步」融匯貫通，所以大家都可以睇到Kobe進攻時嘅腳步有幾犀利。 | |
| 除左Kobe，LeBron James及火箭傳奇中鋒姚明亦都曾拜「大夢」門下，另外仲有Dwight Howard、Carmelo Anthony、Amar’e Stoudemire、Josh Smith、JaVale McGee等等亦都曾受過「大夢」嘅指導。當然，唔係人人好似Kobe咁可以完全將「夢幻舞步」融入自己嘅技術入面，但係睇見咁多人搵「大夢」拜師，就知呢種技術有幾咁令人期待。 | |
|
| |
| 而睇番現今NBA，呢種籃底下嘅高級技術已經越黎越少見，但係其中好似紐約人的Kristaps Porzingis同76人「大帝」Joel Embiid就有相當嘅天賦，佢地喺籃底下都曾經用過類似嘅「夢幻夢步」，最終佢地亦成功因此而得分。 | |
| 其實「夢幻舞步」係一項非常實用嘅技術，但係就唔會好似「天勾」咁需要天賦，同埋因為腳步係籃球基本能力，所以「夢幻舞歲」能夠學習得到嘅可能性亦高得多。唔知睇完咁多段訓練影片，你又會唔會好想即刻落去籃球場試下呢？ | |
