較早前，曼聯已經宣佈唔會同有傷在身嘅「呂布」伊巴謙莫域續約，因此一直盛傳摩連奴正追逐部份當紅前鋒，其中包括皇馬嘅莫拉達同愛華頓嘅盧卡古。而雖然曼聯陣中其實都仲有前鋒選擇，但係就未能充當大任，其中好似隊長朗尼就已經完全令摩連奴失去信任，唔少傳聞都指呢位英格蘭射手好大機會喺今夏離隊。近日甚至有傳曼聯可能會以朗尼作為籌賣去收購盧卡古，但係今日呢個可能性已經消失啦，因為曼聯已經正式以7500萬鎊完成收購盧卡古，而朗尼亦唔牽涉呢宗交易當中。