| 今日要溝女，無論你唱歌幾難聽都一定要學識彈下結他，問題係好多人學結他都伙為咗氹女仔，再唔係就係示愛、求婚，喺「表現」為主嘅情況下，仲慢慢由樂理、基本技巧學起就太過漫長，如果係咁，由結他品牌Fender出嘅呢個「Fender Play」就啱哂你啦。 | |
| |
| Fender會先詢問用家幾個問題，斷定你鍾意邊類型嘅音樂，然後就會為你度身訂造以歌曲為本嘅影音學習課程。用家會一邊學習基本技巧，一邊學習點樣去彈出你自己鍾意嘅音樂，都算係相當目標為本嘅做法。Fender就認為咁樣會降低學習門檻，亦會加強初學者嘅興趣——畢竟有研究顯示有九成學習結他嘅人都捱唔過第一年，冇入學就冇人買，冇人買咁就要執架啦嘛。 | |
| 縱然Fender Play唔係市場上第一個以同樣概念推出嘅結他學習APP，但Fender Play提供嘅4K多角度影片相對黎講就更加先進。不過好嘅服務就一定唔係免費，三十日試用之後每個月要19.99美金，以APP嘅月費黎講都唔少嘢，而且目前只限北美同英國嘅iOS用家先有得用。大家想用就要等下——如果你係趕住求婚或者箍煲就最好搵下其他方法啦。 | |
| Fender Play | |
