| |
| 較早前，衛冕總冠軍勇士成功簽下湖人球員「單打王」Nick Young，預計呢位射手將會成為球隊嘅後備主力得分手之一，要知道佢嘅三分球能力其實亦屬於聯盟頂級，所以可以想像來季勇士嘅三分雨情況將會進一步加強。 | |
| 本來效力湖人時嘅Young對Kobe Bryant推崇備至，但係如今轉投勇士之後，佢嘅心隨即亦都完全投入勇士嘅懷抱，成為一位完全嘅勇士人。 | |
| 相信唔少球迷都知道，Young一向有個句講個句，完全唔怕講同媒體表達自己嘅諗法。而近日，佢就喺網上同球迷進行互動，有球迷問佢覺得勇士隊內最出色嘅射手係邊個嘅時候，相信正路黎講都係會揀Stephen Curry、Kevin Durant或者Klay Thompson，再唔係以Young性格佢可能會講係自己。不過，佢嘅答案又真係估佢唔到，因為佢最終揀嘅係Steve Kerr，亦即係球隊主教練。 | |
| |
| 呢個答案唔知可唔可以諗成係擦老闆鞋，不過其實Kerr又確實係NBA一位著名射手，曾協助「籃球之神」Michael Jordan拎過NBA總冠軍，而且佢生涯嘅三分球命中率達到45.4%，所以Young嘅答案絕對唔可以算係錯，只可以講嘅答得太妙啦。 | |
| |
| 除此之外，亦有球迷問Young會唔會黎緊隨勇士成功奪冠後，就會回歸湖人同一班年輕球員嘗試挑戰總冠軍。對於呢個建議Young無完全排除可能性，不過講左其實都唔會點可能發生，因為佢話：「除非Kobe Bryant同Michael Jordan復出加盟湖人吧。」咁即係機會其實可以話係零，因為Jordan已經54歲，兼且已經成為黃蜂嘅老闆，點諗都200％唔會復出加盟湖人。而Kobe亦喺2016年4月宣佈退役，宜家同家人生活得好好，同埋亦都要打理自己嘅公司。所以，Young要回歸湖人睇怕都係無可能架啦。 | |
| |
| 另外最重要嘅係，效力勇士代表Young將擁有最大機會獲得總冠軍，一個名成利就嘅機會試問一位未拎過總冠軍嘅球員又點會放過呢？拎左一次冠軍就走比著你都唔會啦，所以好肯定只要有機會Young都一定會希望留隊的呢。
|
