| |
全城球迷期待嘅英超亞洲盃終於喺尋晚上演啦，四支英超球隊：利物浦、李斯特城、西布朗同埋水晶宮喺香港大球場進行左賽事嘅首日比賽，香港嘅球迷終於可以近距離睇到世界最激烈嘅足球聯賽佢地嘅球隊進行廝殺。而據大會提供嘅數字，是次賽事嘅入場人數超過39000人，基本上已經非常接近達到大球場最多容納人數40000人，可見今次賽事幾受香港市民歡迎。 | |
| 雖然今次英超亞洲盃屬熱身賽性質，但係4支球隊亦都完全唔Hea，差唔多Full Team黎香港參加比賽，好似其中最多球迷嘅利記除左古天奴、法明奴、軒達臣、米奴列、史杜列治等主力有黎香港之外，新加盟嘅「埃及美斯」沙拿亦有現身。另一邊廂2016年英超冠軍李斯特城主力華迪同馬列斯亦有參戰，除左利物浦之外佢地就係最受香港球迷歡迎嘅球星啦。 | |
| 講番尋日兩場比賽，頭場由李斯特城vs西布朗，其中華Dee等部份李城主力先擔任後備，正選由馬列斯同一班年輕球員領軍，所以上半場西布朗反而更加佔據優勢，並且更先開紀錄，引爆現場氣氛。不過，喺西布朗入波後，李城主力馬列斯開始上力，多次進行突破，最終喺落後14分鐘後，成功以左腳射入靚波，將比數追成1：1。下半場，雖然華迪依然踢得好落力，但係雙方就始終搵唔到咩機會，最終法定時間比賽以1：1完場，雙方立即以12碼決勝負。 | |
| 而今次賽事引入新嘅12碼系統，就係由傳統嘅兩支球隊一人射一球，變成ABBA嘅射波次序，ABBA嘅意思係球隊A射左第一球12碼後，球隊B將會射兩球，然後又輪到球隊A射兩球，如此類推，因為咁樣處理被認為係更加公平嘅做法。 | |
| 而喺李斯特城同西布朗嘅12碼大戰入面，未知係咪雙方都無咩壓力，所以個個球員都射出好靚嘅12碼，前5輪雙方全部入晒，黎到即時死亡嘅第7輪，西布朗球員嘅射門被門將撲出，其後李斯特城球員成功射入，成功將李斯特城帶入決賽。 | |
| 12碼大戰過後，終於到現場大部份球迷都期待嘅利物浦登場，佢地嘅對手係由前荷蘭名將法蘭迪保亞領軍嘅水晶宮。同李城一樣，領隊高普先將部份主力收起，其中包括最受歡迎嘅古天奴。由於現場紅軍球迷眾多，所以大球場就好似變左利記主場晏菲路球場咁，只要利記球員進攻或有精彩嘅表現時，球迷都會大聲歡呼。而全場高潮當然就係古天奴後備入替，呢位紅軍10號一舉手一投足都充滿巨星風範，而佢嘅技術亦相信令現場球迷睇得如痴如醉。 | |
| |
| 最終，利記憑住蘇蘭基同奧歷治嘅入球，成功以2：0擊敗水晶宮，晉身決賽面對李斯特城。而決賽呢場戲碼，相信必然十分精彩，香港嘅球迷有福啦！ | |
