| |
今年夏天，曼聯以7500萬鎊成功簽下愛華頓前鋒盧卡古。作為上屆英超射手榜排名第2位嘅球員，24歲嘅盧卡古被認為越黎越成熟，兼且擁有出色嘅速度、身型以及入球能力，所以領隊摩連奴先會願意再一次同呢位前車路士前共事。另外，由於上季曼聯嘅首席射手伊巴謙莫域仍然處於養傷階段，所以基本上曼聯都將球隊嘅入球重責放喺盧卡古身上。 | |
| 而岩岩曼聯就同皇馬上演左歐洲超級盃賽事，對於紅魔鬼黎講呢場比賽可以話喺新球季前最具挑戰性嘅一場比賽，最終雖然C朗只係後備上陣，再加上盧卡古成功為曼聯攻入第一個正式入球，但係皇馬仍然以2：1擊敗曼聯，成功衛冕賽事冠軍。
| |
| 喺呢場比賽入面，皇馬基本上全場控制戰局，曼聯埋門嘅機會少之又少，而作為曼聯前鋒線上嘅尖刀，盧卡古可以話被寄予厚望，要喺罕有出現嘅機會下把握入球嘅機會。不過，睇番同皇馬呢場比賽入面，盧卡古喺上半場浪費左一次近門得分嘅機會，喺無人看管下竟然將個波一射沖天，令球隊未能喺較早嘅時間追番一球。 | |
| 除此之外，喺比賽上半場35分鐘嘅時候，靴里拉成功從卻奧斯腳下偷走個波，當時如果靴里拉可以成功繼續盤球前進嘅話，好大機會係一次單刀嘅機會，點知越位嘅盧卡古竟然衝落黎搶走左個波，令呢次曼聯嘅黃金機會浪費晒，對此靴里拉亦對盧卡古大感不滿，而差啲成為罪人嘅卻奧斯卻偷偷暗笑，全靠盧卡古先救番佢一命。 | |
| 摩連奴見到盧卡古以上呢幾次浪費機會，唔知會有咩諗法，特別係越位個次說明佢嘅球商並唔高。雖然最終佢成功喺門前執雞攻入加入曼聯後嘅第一個正式比賽嘅入球，但作為7500萬鎊身價嘅球員，盧卡古嘅把握力同埋球商好似都仍然有好大嘅進步空間，如果黎緊一季繼續出現呢類型嘅浪費機會，好大機會佢就會被貼上水貨嘅稱號。 |
