如果普通人著好皺嘅衫，就會畀人一種唔整潔嘅印象；但如果係靚仔，一樣覺得咁有型，仲可能因為件衫夠皺夠舊，多咗種vintage味道更吸引。

普通人喺巴士地鐵上，如果唔小心同女性有身體接觸，好可能被當成色狼，畀人以為想佔女女便宜；但只要係靚仔，掂下完全冇問題，分分鐘條女覺得自己有著數添。

邊個話男女朋友先可以錫錫，只要你係靚仔，就算未開始拍拖都可以周圍錫人唔畀人告！

有時睇戲見到啲肉麻台詞，心諗講出嚟條女一定受，點知到你真係講出口，條女竟然Dead air唔出聲……但換著係個靚仔講，佢就可以即時投入返喺部戲入面，覺得好冧豬，呢個完全係顏值問題而唔係句台詞問題。

自以為是嘅人點都係難頂啲，但一個醜嘅人得得戚戚咁，就會相當乞人憎；而一個靚仔表現自傲，反而令人信服，認為佢值得咁驕傲。

通常女性對靚仔都比較包容，如果一個普通人蠢，佢哋可能會厭棄；但如果一個靚仔冇腦，佢哋就覺得︰生得靚就夠，就算有啲蠢都幾可愛丫！

雖然係好唔公平，但無奈大家都要接受，世界係有雙重標準。