阿媽教落,做人最緊要有睇肉……係體育精神,勝不驕敗不餒。前日喺美國ZOTAC一場《StarCraft》(星際爭霸)電競比賽上,韓國選手Larva(임홍규)眼見自己遠遠拋離大陸對手Legend(羅賢),竟然用腳打機。事件引起軒然大波,主辦單位最後更決定DQ Larva,禁止佢再參與任何賽事。
12月4日於美國洛杉磯舉行嘅ZOTAC CUP MASTERS:StarCraft Remastered電競比賽上,其中一場表演賽由韓國選手Larva對戰大陸選手羅賢。開戰冇耐,Larva見自己穩操勝劵,就開始玩花式,初初只係操控部隊喺度扭扭另另跳下舞;之後就得寸進尺,收起左手,放埋左腳上枱打機。喂好寸啫阿哥,雖然又諗唔明,點解佢啲腳趾咁靈活嘅呢?到最尾,Larva索性打都懶得打,交叉雙手瞓喺張椅度抖抖。
此舉惹來羅賢及大陸網民不滿,羅賢於微博上形容Larva為「腦子有病的人」,質疑佢從能獲得咩樂趣或者累積弱智粉絲。部分大陸網民亦抨擊佢只係「猴子」,令自己同國家蒙羞,更有人話夠膽就拎條J出嚟真「屌打」。Larva就反駁,行為已得到主辦方同意。